«Ալ Քաիդա»-ն իր ճյուղերն ունի աշխարհի ավելի քան 80 երկրում, այդ թվում՝ ԱՄՆ-ում և Կանադայում․ ՌԴ Անվտանգության խորհրդի քարտուղար

«Ալ Քաիդա» միջազգային ահաբեկչական խմբավորումն իր ենթաճյուղերն ունի աշխարհի ավելի քան 80 երկրում, այդ թվում նաև՝ ԱՄՆ-ում և Կանադայում։ Այս մասին «Аргументы и факты» թերթին տված հարցազրույցում հայտարարել է Ռուսաստանի Դաշնության Անվտանգության խորհրդի քարտուղար Նիկոլայ Պատրուշևը։

«Ահաբեկիչների ղեկավարները, հասկանալով, որ նախկինում իրենց տիրապետության տակ գտնված տարածքներում իրենց ոչնչացում է սպառնում, սկսեցին փոխել մարտավարությունը։ Այժմ շեշտը դրվում է աշխարհի տարբեր երկրներում ենթաճյուղեր ստեղծելու և ծայրահեղական գաղափարները լայնորեն տարածելու վրա», - ասել է Պատրուշևը։

«Միայն «Ալ Քաիդա» խմբավորումը, համաձայն տարբեր հաշվարկների, իր ճյուղերն ունի արդեն աշխարհի ավելի քան 80 երկրում, այդ թվում՝ Միացյալ Նահանգներում և Կանադայում», - շարունակել է Անվտանգության խորհրդի քարտուղարը։