Թուրքիայում Գյուլենական շարժմանն անդամակցելու մեղադրանքով ազատազրկման է ենթարկվել 27 մարդ

Թուրքիայում Գյուլենական շարժման հետ կապեր ունենալու մեղադրանքով ազատազրկման է ենթարկվել 27 մարդ։ Այս մասին տեղեկացնում է թուրքական Անադոլու լրատվական գործակալությունը՝ հղում կատարելով երկրի անվտանգության ուժերի հաղորդագրությանը։

Աղբյուրի փոխանցմամբ՝ ձերբակալվածների թվում են իրավաբաններ, ոստիկանության նախկին ղեկավար, ինչպես նաև Գյուլենական շարժման կոորդինատորներ։ Ընդհանուր առմամբ՝ նրանք ենթարկվել են 1-ից մինչև 12 տարի ազատազրկման։

Ավելի վաղ Թուրքիայի անվտագության ուժերը նույն մեղադրանքով ձերբակալել էին 54 մարդու։

Հիշեցնենք, որ նախորդ տարվա հուլիսի 15-ին Թուրքիայում զինվորականները հեղաշրջման փորձ են կազմակերպել։ Ոստիկանությանը հաջողվել էր ճնշել ապստամբներին, և հեղաշրջման փորձը ձախողվել էր։ Թուրքիայի իշխանությունները հեղաշրջման փորձի կազմակերպման մեջ մեղադրում են Թուրքիայում արդի իսլամական գաղափարախոսության հիմնադիր Ֆեթուլլահ Գյուլենին, որը 1999 թվականից բնակվում է ԱՄՆ-ում։

Թուրքիայի նախագահ Էրդողանն ԱՄՆ-ի իշխանություններից մի քանի անգամ պահանջել է Գյուլենին ձերբակալել և արտահանձնել Թուրքիային, սակայն մերժում է ստացել։ Ըստ ամերկյան կողմի՝ Թուրքիայի իշխանությունները չեն տրամադրել հեղաշրջման փորձին Գյուլենի մասնակցության վերաբերյալ բավարար ապացույցներ։