Իրանում բողոքի ակցիաները կշարունակվեն․ ԱՄՆ-ի հատուկ ծառայությունների ղեկավար
Իրանում տեղի ունեցող բողոքի ակցիաները չի կարելի համարել ավարտված։ Այս մասին Fox News լրատվականին տված հարցազրույցում հայտարարել է ԱՄՆ-ի Կենտրոնական հետախուզական վարչության ղեկավար Մայք Պոմպեոն։
«Իրանական ռեժիմը ժողովրդին սպառնում է բռնությամբ, իսկ «Իսլամական հեղափոխության պահապանների» կորպուսի հրամանատարներից Քասեմ Սուլեյմանին փողերը քամուն է տալիս Լիբիայում, Սիրիայում, Եմենում՝ աջակցելով Աստված գիտի, թե ում, և Իրանը վերածելով աշխարհում ահաբեկչությանն աջակցող խոշորագույն երկրի», - հայտարարել է ԿՀՎ պետը։
«Ակնկալում եմ, որ Իրանի ժողովուրդը կշարունակի իր բողոքն արտահայտել իշխանությունների դեմ։ Վստահ եմ, որ բողոքի ակցիաները չեն ավարտվել», - շարունակել է Պոմպեոն։
Նա կտրականապես ժխտել է Թեհրանի այն պնդումները, որ բողոքի ակցիաների կազակերպման հետևում կանգնած են ԱՄՆ-ի հատուկ ծառայությունները։
«Դա կազմակերպել է Իրանի ժողովուդը՝ իշխանություններից պահանջելով ավելի բարեկեցիկ կյանքի պայմաններ», - ընդգծել է ԿՀՎ ղեկավարը։
Հիշեցնենք, որ Իրանում հակակառավարական ցույցերն սկսվել են դեկտեմբերի 28-ին։ Տարբեր քաղաքներում տեղի ունեցող ակցիաների մասնակիցները դժգոհում են թանկացումներից։ Որոշ տեղերում ցույցերը վերաճել են իրավապահների հետ զանգվածային բախումների, ինչի հետևանքով զոհվել է ավելի քան 20 մարդ, այդ թվում նաև ոստիկանության աշխատակիցներ։ Իրանի իշխանությունների տվյալներով՝ ցույցերի ընթացքում տեղի ունեցած անկարգությունների հետևանքով ձերբակալվել է ավելի քան 450 մարդ։ Որոշ աղբյուրների համաձայն՝ ձերբակալվածների թիվը հասնում է 2000-ի։