Բրիտանացի 15-ամյա դպրոցականը կարողացել է հասանելիություն ստանալ ամերիկյան հատուկ ծառայությունների տվյալներին՝ ներկայանալով որպես ԿՀՎ ղեկավար
Մեծ Բրիտանիայում 15-ամյա մի դպրոցական կարողացել է հասանելիություն ստանալ ամերիկյան հատուկ ծառայությունների՝ Իրանում և Աֆղանստանում գաղտնի գործողությունների մասին տեղեկատվությանը՝ ձևանալով որպես ԱՄՆ Կենտրոնական հետախուզական վարչության ղեկավար։ Այս մասին գրում է The Telegraph-ը։
Աղբյուրի փոխանցմամբ՝ դեպքը տեղի է ունեցել երեք տարի առաջ։ Մեծ Բրիտանիայի՝ այսօր արդեն 18-ամյա քաղաքացի Քեյլ Գամբլը խոստովանել է, որ երեք տարի առաջ փորձել է կիբերհարձակման միջոցով կոտրել ԿՀՎ-ի նախկին պետ Ջոն Բրենանի, ՀԴԲ-ի ղեկավարի տեղակալ Մարկ Ջուլիանոյի և ամերիկացի բարձրաստիճան այլ պաշտոնյաների համակարգիչները։
Նա թիրախավորել էր նաև ԱՄՆ-ի ներքին անվտանգության քարտուղարի և Բարաք Օբամայի օրոք ԱՄՆ-ի Ազգային հետախուզության տնօրենի համակարգիչները։
Գամբլը, ծաղրելով իր «զոհերին», ստանում էր նրանց մասին անձնական տեղեկատվություն, նամակներով և զանգերով «ռմբակոծում էր նրանց», պոռնգրաֆիկ նյութեր ներբեռնում նրանց համակարգիչներ և կառավարում նրանց iPad-ները և հեռուստացույցները։
Հարձակման ենթարկված գործիչները ստիպված են եղել հաճախ դիմել տեխնիկական աջակցության ծառայությանը և փոխել գաղտնաբառերը։
Հատկանշական է, որ տեխնիկական աջակցման ծառայությանը դիմել է նաև Գամբլը՝ ներկայանալով որպես հարձակման ենթարկած պաշտոնյա։ Այդպիսով նա կարողանում էր հասանելիություն ստանալ նրանց հաշիվներին ևս։
Դատարանում Քելյ Գամբլը հայտարարել է, որ այդ քայլին գնացել է, քանի որ իրեն նյարդայնացրել է «Միացյալ Նահանգների կառավարության սառնասրտությունը և այնտեղ տիրող կոռուպցիան»։