ԱՄՆ-ը չի պատրաստվում զորքերը դուրս բերել սիրիական Մանբիջից․ Պենտագոն
ԱՄՆ Զինված ուժերի Կենտրոնական հրամանատարության ղեկավար Ժոզեֆ Վոտելը հայտարարել է, որ ամերիկյան զորքը չի պատրաստվում լքել սիրիական Մանբիջը։ Այս մասին հայտնում է CNN-ը։
«Մենք չենք քննարկում ամերիկյան զորքի դուրսբերման հարցը սիրիական այդ բնակավայրից», - ասել է Վոտելը։
Հիշեցնենք, որ հունվարի 20-ին Թուրքիայի Զինված ուժերն սկսել են «Ձիթենու ճյուղ» անվանումն ստացած ռազմական գործողությունը, որն ուղղված է սիրիական Աֆրինում քրդական «Ազգային ինքնապաշտպանական ջոկատներ» զորամիավորման և «Ժողովրդավարական միություն» կուսակցության դեմ։
Գործողությունը սկսելուց երկու օր անց Էրդողանը հայտարարել է, որ թուրքական զորքերը կլքեն Սիրիայի տարածքը միայն վերջնական նպատակին հասնելուց հետո։ Նա նշել է նաև, որ իրենց գործողություններն «ուղղված են ոչ թե քրդերի, այլ ահաբեկիչների միջանցք ստեղծելու դեմ»։
Էրդողանն ավելի ուշ հայտարարել է նաև, որ իրենք կարող են շարժվել դեպի Մանբիջ, որը գտնվում է «Սիրիայի դեմոկրատական ուժեր» զորամիավորման վերահսկողության տակ։
Ինչպես հայտնում է Reuters գործակալությունը, Թուրքիայի արտգործնախարար Մևլութ Չավուշօղլուն նախորդ շաբաթ ունեցած ելույթի ժամանակ ԱՄՆ-ին կոչ էր արել «անհապաղ դուրս բերել զորքերը Մանբիջից»։