Իսրայելի իշխանությունները չեղարկել են լեհ պաշտոնյայի այցը Երուսաղեմ

Իսրայելի իշխանությունները չեղարկել են Լեհաստանի Ազգային անվտանգության բյուրոյի ղեկավար Պավել Սոլոխի այցը Երուսաղեմ։ Այս մասին գրում է Ռիա Նովոստի-ն՝ հղում կատարելով Իսրայելի արտաքին գործերի նախարարությանը։

Նշվում է, որ Իսրայելի իշխանությունների որոշումը կապված է Լեհաստանի խորհրդարանում քննարկվող օրինագծի հետ։ Փաստաթուղթը քրեականացնում է Երկրորդ համաշխարհային պատերազմի և հրեաների ցեղասպանության ժամանակ լեհերի հանցագործությունների մասին հայտարարությունները։

Հաշվի չառնելով հրեաների բողոքի ակցիաները՝ լեհական խորհրդարանն ընդունել է օրենքը, և այն այժմ պետք է հավանության արժանանա նախագահի կողմից։

Վերոնշյալ օրենքի համաձայն՝ այն անձինք, որոնք հրապարակավ կհայտարարեն, որ Լեհաստանը կամ լեհ ժողովուրդը պատասխանատվություն է կրում Երրորդ Ռայխի նացիստական հանցագործությունների կամ աշխարհի և մարդկության նկատմամբ այլ հանցագործությունների համար, կենթարկվեն մինչև երեք տարվա ազատազրման։

Թել Ավիվն անհանգստացած է, որ օրենքը կարող է հարվածել նաև հրեաներին, որոնք կցանկանան պատմել լեհ ժողովորդի պատճառով կրած տառապանքների մասին։

Օրեր առաջ Իսրայելի տրանսպորտի և հետախուզության նախարարը վարչապետ Բենիամին Նեթանյահուին կոչ էր արել անհապաղ հետ կանչել Լեհաստանում Իսրայելի դեսպանին։