Իսրայելը հույս ունի, որ Լեհաստանը փոփոխություններ կմտցնի Հոլոքոստի մասին օրենքում

Իսրայելը շարունակում է Լեհաստանի իշխանությունների հետ բանակցել Հոլոքոստին լեհերի ներգրավվածության մասին բարձրաձայնելու համար քրեական պաասխանատվություն նախատեսող օրենքի վերանայման հարցի շուրջ։ Այս մասին ասվոմ է հրեական պետության արտաքին գործերի նախարարության տարածած հաղորդագրության մեջ, որին նախորդել է Լեհսատանի նախագահ Անջեյ Դուդայի հայտարարությունը օրենքը հավանության արժանացնելու այնուհետև սահմանադրական դատարան ուղարկելու ցանկության մասին։

«Իսրայելը նշում է, որ Լեհաստանի նախագահն օրենքն ուղարկել է սահմանադրական դատարան՝ այն լրամշակելու։ Հուսով ենք, որ այս ընթացքում մենք կկարողանանք հասնել նրան, որ օրենքում փոփոխություններ մտցվեն», - ասվում է Իսրայելի արտգործնախարարության տարածած հաղորդագրութան մեջ։

Նշվում է նաև, որ Իսրայելը և Լեհաստանը համատեղ պատասխանատվություն են կրում Հոլոքոստի պատմության պահպանման և հետաքննության հարցում։

Հիշեցնենք, որ փետրվարի 1-ին Լեհաստանի խորհրդարանի վերին պալատը՝ Սենատը, ընդունել էր օրենք՝ Լեհաստանի ազգային հիշողության ինստիտուտի մասին։ Համաձայն այս օրենքի՝ այն անձինք, որոնք հրապարակավ կհայտարարեն, որ Լեհաստանը կամ լեհ ժողովուրդը պատասխանատվություն է կրում Երրորդ Ռայխի նացիստական հանցագործությունների կամ աշխարհի և մարդկության նկատմամբ այլ հանցագործությունների համար, կենթարկվեն մինչև երեք տարվա ազատազրման։

Թել Ավիվն անհանգստացած է, որ օրենքը կարող է հարվածել նաև հրեաներին, որոնք կցանկանան պատմել լեհ ժողովորդի պատճառով կրած տառապանքների մասին։

Օրեր առաջ Իսրայելի տրանսպորտի և հետախուզության նախարարը վարչապետ Բենիամին Նեթանյահուին կոչ էր արել անհապաղ հետ կանչել Լեհաստանում Իսրայելի դեսպանին։