Ֆրանսիայի ԱԳՆ-ը քննադատել է Լեհաստանում ընդունված օրենքը Հոլոքոստի մասին

Ֆրանսիայի արտաքին գործերի նախարար Ժան-Իվ Լե Դրիանը քննադատել է Լեհաստանում ընդունված օրենքը, ըստ որի՝ քրեական պատասխանատվության են ենթարկվելու Հոլոքոստին լեհերի ներգրավվածության մասին բարձրաձայնողները։ Այս մասին, ինչպես հայտնում է Ռիա Նովոստի-ն, Լե Դրիանը խոսել է BFMTV-ի եթերում։

«Մենք այս օրենքը համարում ենք անտեղի։ Պետք չէ վերաշարադրել պատմությունը, դա երբեք լավ չէ», - ասել է Ֆրանսիայի արտաքին քաղաքական գերատեսչության ղեկավարը։

Հիշեցնենք, որ փետրվարի 1-ին Լեհաստանի խորհրդարանի վերին պալատը՝ Սենատը, ընդունել էր օրենք՝ Լեհաստանի ազգային հիշողության ինստիտուտի մասին։ Համաձայն այս օրենքի՝ այն անձինք, որոնք հրապարակավ կհայտարարեն, որ Լեհաստանը կամ լեհ ժողովուրդը պատասխանատվություն է կրում Երրորդ Ռայխի նացիստական հանցագործությունների կամ աշխարհի և մարդկության նկատմամբ այլ հանցագործությունների համար, կենթարկվեն մինչև երեք տարվա ազատազրման։

Թել Ավիվն անհանգստացած է, որ օրենքը կարող է հարվածել նաև հրեաներին, որոնք կցանկանան պատմել լեհ ժողովորդի պատճառով կրած տառապանքների մասին։

Օրեր առաջ Իսրայելի տրանսպորտի և հետախուզության նախարարը վարչապետ Բենիամին Նեթանյահուին կոչ էր արել անհապաղ հետ կանչել Լեհաստանում Իսրայելի դեսպանին։