Չենք պատրաստվում Թուրքիայի պահանջով դուրս բերել մեր զորքերը Մանբիջից․ ԱՄՆ պաշտպանության նախարար
ԱՄՆ-ը չի պատրաստվում տեղի տալ Թուրքիայի ճնշումներին, որը պահանջում է դուրս բերել ամերիկյան զորքերը սիրիական Մանբիջից։ Այս մասին լրագրողների հետ ճեպազրույցի ժամանակ հայտարարել է ԱՄՆ պաշտպանության նախարար Ջեյմս Մեթիսը։
«Ինչ վերաբերում է Մանբիջի վերաբերյալ Թուրքիայի ճնշմանը, ապա նշեմ, որ իրավիճակը չի փոխվել։ Մենք ըմբռնումով ենք մոտենում այն տագնապին, որն Անկարան ապրում է Սիրիայի քրդերի հարցով։ Սակայն մեր նպատակն այժմ «Իսլամական պետություն» ահաբեկչական խմբավորման վրա ճնշում գործադրելն է», - ասել է Մեթիսը։
Նրա խոսքով՝ ԱՄՆ-ն անհանգստացած է, որ Աֆրինում թուրքական բանակի ռազմական գործողությունները «կարող են ուշադրությունը շեղել ԻՊ-ի դեմ պայքարից»։
«Մենք Թուրքիայի հետ համագործակցում ենք վերջինիս անվտանգությանը վերաբերող հարցերում, ինչի շուրջ Անկարան խիստ անհանգստացած է։ Թուրքիան ՆԱՏՕ-ի մեր դաշնակիցն է, և մենք նրա հետ քննարկում ենք այս հարցերը անվտանգության բոլոր մակարդակներով։ Ես հաջորդ շաբաթ Բրյուսելում հանդիպում եմ ունենալու նրանց պաշտպանության նախարարի հետ», - շարունակել է Պենտագոնի ղեկավարը։
Հիշեցնենք, որ հունվարի 20-ին Թուրքիայի Զինված ուժերը սկսել են «Ձիթենու ճյուղ» անվանումն ստացած ռազմական գործողությունը, որն ուղղված է սիրիական Աֆրինում քրդական «Ազգային ինքնապաշտպանական ջոկատներ» զորամիավորման և «Ժողովրդավարական միություն» կուսակցության դեմ։ Թուրքական բանակի կողմից գործողությանը մասնակցում է նաև «Սիրիական ազատ բանակ» կոչվող ընդդիմադիր զորաջոկատը։
Թուրքայի նախագահ Ռեջեփ Թայիփ Էրդողանը մի քանի անգամ հայտարարել է, որ գործողությունը կարող է տարածվել դեպի Մանբիջ, որը գտնվում է «Սիրիայի դեմոկրատական ուժեր» (SDF) խմբավորման վերահսկողության տակ։ Նա ԱՄՆ-ին կոչ է արել նաև Մանիջից դուրս բերել այստեղ գտնվող ամերիկյան ստորաբաժանումները։ Անկարան չի թաքցնում Վաշինգտոնից իր դժգոհությունը՝ կապված քրդերին աջակցոթյուն ցույց տալու հետ։