Մեծ Բրիտանիան կարող է 350 միլիարդ դոլար կորցնել առանց Բրյուսելի հետ առևտրային համաձայնագրի

Մեծ Բրիտանիայի տնտեսությունը 15 տարվա ընթացքում կարող է կորցնել մոտ 350 միլիարդ դոլար, եթե Եվրոպական Միության կազմից դուրս գա առանց Բրյուսելի հետ առևտրային գործարքի։ Այս մասին գրում է բրիտանական The Independent թերթը՝ հղում կատարելով The Best for Britain Group-ի կատարած հետազոտությանը։

Աղբյուրի հավաստմամբ՝ կանխատեսումները հիմնված են կառավարական ինֆորմացիայի արտահոսքի վրա։ Սցենարի համաձայն՝ եթե նույնիսկ Լոնդոնին հաջողվի Բրյուսելի հետ ազատ առևտրի համաձայնագիր կնքել, 15 տարվա ընթացքում Մեծ Բրիտանիայի ՀՆԱ-ի կորստի չափը կկազմի 181 միլիարդ դոլար։ Իսկ եթե Մեծ Բրիտանիայի իշխանությունները փոխեն իրենց դիրքորոշումը և պահպանեն մաքսային միությունում և եվրոպական շուկայում իրենց անդամակցությունը, կորուստը կկազմի 72 միլիարդ դոլար։

The Best for Britain Group-ի ներկայացուցիչ Մարկ Բրաունի խոսքով՝ Brexit-ը ամենից շատ վնաս կհասցնի Միացյալ Թագավորության առողջապահության, կրթության և սոցիալական ծառայությունների ոլորտներին։

«Երկրի ողջ ժողովրդի համար լավագույն տարբերակը բոլոր գործող համաձայնագրերը պահպանելն է», - ասել է նա։

Brexit-ի հարցով բանակցություններն սկսվել են 2017 թ․ հունիսի 19-ին՝ Եվրամիությունից Մեծ Բրիտանիայի դուրս գալու վերաբերյալ հանրաքվեի անցկացումից մոտ մեկ տարի անց։ Հիշեցնենք, որ հանրաքվեի արդյունքում 51,9% ձայնով հաղթանակ էին տարել Brexit-ի կողմնակիցները։