Թիլերսոնի՝ Էրդողանի հետ ունեցած հանդիպումը բավական արդյունավետ էր․ Պետքարտուղարություն
ԱՄՆ-ում կարծում են, որ պետքարտուղար Ռեքս Թիլերսոնի և Թուրքիայի նախագահ Ռեջեփ Թայիփ Էրդողանի միջև հանդիպումը բավական արդյունավետ էր։ Այս մասին Ռիա Նովոստի-ին հայտնել են ԱՄՆ պետքարտուղարությունից։
«Նրանք բաց և արդյունավետ երկխոսություն են ունեցել Թուրքիայի և ԱՄՆ-ի փոխշահավետ համագործակցության ուղիները զարգացնելու վերաբերյալ։ Հույս ունենք, որ ՆԱՏՕ-ի մեր դաշնակից Թուրքիայի հետ հարաբերություններում առաջընթաց կգրանցվի նաև ԱԳ նախարար Մևլութ Չավուշօղլուի հետ բանակցությունների արդյունքում», - հայտարարել է պետքարտուղարության ներկայացուցիչը։
Թուրքիայի նախագահի աշխատակազմի ներկայացուցիչն, իր հերթին, հայտարարել է, որ Էրդողանի և Թիլերսոնի՝ ավելի քան 3 ժամ տևած հանդիպման ընթացքում, ի թիվս մի շարք այլ հարցերի, քննարկվել է Իրաքում և Սիրիայում տիրող իրավիճակը, ինչպես նաև ահաբեկչության դեմ պայքարը։
Ներկայում Թուրքիաի և ԱՄՆ-ի հարաբերությունները բավական լարված վիճակում են։ Դա գլխավորապես կապված է Վաշինգտոնի կողմից քրդական զորամիավորումներին աջակցություն ցույց տալու հետ։
Հիշեցնենք, որ հունվարի 20-ին Թուրքիայի Զինված ուժերը սկսել են «Ձիթենու ճյուղ» անվանումն ստացած ռազմական գործողությունը, որն ուղղված է սիրիական Աֆրինում քրդական «Ազգային ինքնապաշտպանական ջոկատներ» զորամիավորման և «Ժողովրդավարական միություն» կուսակցության դեմ։ Թուրքական բանակի կողմից գործողությանը մասնակցում է նաև «Սիրիական ազատ բանակ» կոչվող ընդդիմադիր զորաջոկատը։