Անկարան և Վաշինգտոնը որոշել են ստեղծել հարաբերությունների կարգավորման մեխանիզմ

ԱՄՆ պետարտուղար Ռեքս Թիլերսոնի՝ Թուրքիա կատարած այցի ընթացքում Անկարան և Վաշինգտոնը պայմանավորվել են ստեղծել թուրք-ամերիկյան հարաբերությունները կարգավորելու մեխանիզմ։ Այս մասին ամերիկացի գործընկերոջ հետ համատեղ մամուլի ասուլիսի ընթացքում հայտարարել է Թուրքիայի ԱԳ նախարար Մևլութ Չավուշօղլուն։

Փետրվարի 15-ին Թիլերսոնը երկօրյա այցով ժամանել էր Անկարա, որտեղ երեկ հանդիպում է ունեցել նախագահ Ռեջեփ Թայիփ Էրդողանի, իսկ այսօր՝ արտգործնախարար Մևլութ Չավուշօղլուի հետ։

«Երեկ տեղի է ունեցել պետքարտուղար Թիլերսոնի և մեր առաջնորդ Էրդողանի հանդիպումը, որն անցել է կառուցողական մթնոլորտում, և բոլոր հարցրերը բաց կերպով դրվել են քննարկման։ Քննարկվել է ոչ միայն երկկողմ հարաբերությունները, այլ նաև տարածաշրջանային համագործակցությանն առնչվող հարցեր։ Երեկ մեր ընդհանուր ցանկությամբ որոշել ենք կարգավորել մեր հարաբերությունները։ Միացյալ Նահանգները, սակայն, մեզ բազմիցս խոստումներ է տվել, որոնք չեն պահվել։ Մենք առաջարկում էինք անել այնպիսի քայլեր, որոնք չեն մնա թղթի վրա։ Որոշեցինք ստեղծել մեխանիզմ խնդիրները լուծելու համար», - ասել է Չավուշօղլուն։

Նրա խոսքով՝ այդ մեխանիզմի շրջանակներում թուրք-ամերիկյան առաջին հանդիպումը տեղի կունենա առաջիկա մարտին։

Ներկայում Թուրքիաի և ԱՄՆ-ի հարաբերությունները բավական լարված վիճակում են։ Դա գլխավորապես կապված է Վաշինգտոնի կողմից քրդական զորամիավորումներին աջակցություն ցույց տալու հետ։

Թուրքիան նաև շարունակում է ԱՄՆ-ից պահանջել Անկարա արտահանձնել Գյուլենական շարժման առաջնորդ Ֆեթուլլահ Գյուլենին, որին թուրքական իշխանությունները մեղադրում են 2016 թ․ հեղաշրջման փորձի կազմակերպման մեջ։