«Հյուսիսային հոսք-2» ծրագիրը չի սպառնում Եվրամիության անվտանգությանը․ Անգելա Մերկել

Գերմանիայում կարծում են, որ «Հյուսիսային հոսք-2»-ը տնտեսական ծրագիր է, որը չի սպառնում Եվրոպական Միության անվտանգությանը։ Այս մասին հայտարարել է Գերմանիայի կանցլեր Անգելա Մերկելը․ գրում է Ռիա Նովոստի-ն։

«Մենք կողմ ենք էներգիայի աղբյուրների դիվերսիֆիկացիային։ Ցանկանում ենք, որ գազամուղը նախկինի պես անցնի Ուկրաինայով, սակայն, միևնույն ժամանակ, կարծում ենք, որ «Հյուսիսային հոսք-2»-ը վտանգ չի ներկայացում էներգիայի ներկրման դիվերսիֆիկացիայի հարցում», - Լեհաստանի վարչապետ Մատեուշ Մորավեցկու հետ ունեցած հանդիպմանը հաջորդած համատեղ մամուլի ասուլիսի ժամանակ հայտարարել է Անգելա Մերկելը։

Լեհաստանի վարչապետը հակադարձել է Մերկելին՝ նշելով, որ դա դիվերսիֆկացիա չէ, քանի որ «գազը գալիս է նույն աղբյուրից»։

«Հյուսիսային հոսք-2» ծրագիրը, որի վրա պետք է ծախսվի մոտ 9,5 միլիարդ եվրո, նախատեսում է կառուցել գազատար խողովակների երկու գիծ՝ տարեկան 55 միլիարդ խորանարդ մետր հզորությամբ։ Այսպես՝ ռուսական գազն, անցնելով Բալթիկ ծովով, պետք է հասնի մինչև Գերմանիա։