Պարզվել է Չեռնոգորիայում ամերիկյան դեսպանատան մուտքի մոտ նռնակ նետած անձի ինքնությունը

Պոդգորիցայում ԱՄՆ դեսպանատան մուտքի առջև նռնակը նետել է 43-ամյա ոմն Դալիբոր Յաուկովիչը, որը ծառայել է նախկին հարավսլավական բանակում։ Այս մասին գրում է Ռիա Նովոստի-ն՝ հղում կատարելով չեռնոգորական Vijesti թերթին։

Այս տեղեկատվությունը հաստատել է նաև Չեռնոգորիայի կենտրոնական հեռուստատեսությունը և ռադիոալիքը։

Հիշեցնենք, որ փետրվարի 21-ի լույս 22-ի գիշերը՝ 00:30-ին (Երևանի ժամանակով՝ 03:30, - խմբ․), մի տղամարդ պայթուցիկ սարք էր նետել Պոդգորիցայում ամերիկյան դեսպանատան մուտքի մոտ, այնուհետև՝ ինքնասպան եղել։ Ենթադրվում է, որ այդ պայթուցիկ նյութը եղել է ձեռքի նռնակ։ Դեռ հայտնի չեն հարձակման դրդապատճառները։

Յաուկովիչի ֆեյսբուքյան էջում նշած է, որ նրան շնորհվել է մեդալ՝ Հարավսլավիայի «պաշտպանության և անվտանգության գործում արժանի ներդրում ունենալու» համար։ Նրան պարգևատրել է նշված պետության այդ ժամանակվա ղեկավար Սլոբոդան Միլոշևիչը։ Հրապարակումներից կարելի է ենթադրել, որ Յաուկովիչը դեմ է եղել Չեռնոգորիայի անդամակցությանը ՆԱՏՕ-ին։

Տղամարդն ապրել է Պոդգորիցայում, սակայն ծնունդով Սերբիայի Կրալևո քաղաքից էր։