Մեծ Բրիտանիայի ԱԳ նախարարն իր մոտ է հրավիրել Ռուսաստանի դեսպանին
Մեծ Բրիտանիայի արտաքին գործերի նախարար Բորիս Ջոնսոնն ԱԳՆ է հրավիրել Ռուսաստանի դեսպան Ալեքսանդր Յակովենկոյին՝ կապված Սիրիայում՝ Արևելյան Գուտայում ստեղծված իրավիճակի հետ։ Այս մասին, ինչպես նշում է Ռիա Նովոստի-ն, ասվում է Միացյալ Թագավորության ԱԳ նախարարության պաշտոնական կայքում։
«Ես Ռուսաստանի դեսպանին հրավիրել եմ արտաքին գործերի նախարարություն, որպեսզի նա հատնի, թե ինչ քայլեր է ձեռնարկում իր երկիրը 2401 թվակիր բանաձևի կատարման համար», - հայտարարել է Ջոնսոնը։
Ռուսաստանը մարդասիրական դադար է հայտարարել Արևելյան Գուտայում և զգուշացրել խաղաղ բնակչության դուրսբերման համար միջանցք բացելու մասին։ ՌԴ պաշտպանության նախարար Սերգեյ Շոյգուն հայտարարել է, որ իրեն տվյալներ կհաղորդեն մոտ ժամանակներս։ Նախատեսվում է, որ հումանիտար դադարը լինելու է ամեն օր՝ առավոտյան 09:00-ից մինչև 14:00-ն։
Մեծ Բրիտանիային վրդովվեցրել է ժամանակային այս սահմանումը։ «Եթե Ռուսաստանը կարող է դադար տալ 5 ժամով, ապա կարող է դա անել նաև 24 ժամով։ Ռուսաստանը պետք է որոշի՝ արդյոք լիովին կատարելու է այն բանաձևի պահանջները, որի տակ ինքը ստորագրել է և քվեարկել դրա օգտին, թե ցանկանում է ցինիկ խաղեր խաղալ», - հայտարարել է ՄԱԿ-ում Մեծ Բրիտանիայի մշտական ներկայացուցչի տեղակալ Ջոնաթան Ալենը։
Ավելի վաղ ՄԱԿ-ի Անվտանգության Խորհուրդն ընդունել էր բանաձև, ըստ որի՝ կողմերը պետք է անհապաղ դադարեցնեն կրակը և հայտարարեն 30-օրյա հումանիտար դադար Սիրիայի ամբողջ տարածքում։ Սա անհրաժեշտ է հումանիտար օգնություն հասցնելու և վիրավորներին տարհանեու համար։
Հատկանշական է, որ կրակի դադարեցման ռեժիմը չպետք է գործի «Իսլամական պետություն», «Ջեբհաթ ալ-Նուսրա», «Ալ-Քաիդա» և այլ ահաբեկչական խմբավորումների դեմ ռազմական գործողությունների ժամանակ։