«Ջեբհաթ ալ Նուսրա»-ն գնդակոծում է Արևելյան Գուտայում մարդասիրական միջանցքը
«Ջեբհաթ ալ-Նուսրա» ահաբեկչական խմբավորման զինյալները գնդակոծել են Դամասկոսի մերձակայքում գտնվող Արևելյան Գուտայում մարդասիրական միջացքը։ Այս մասին գրում է ՏԱՍՍ-ը՝ հղում կատարելով սիրիական ՍԱՆԱ գործակալությանը։
Աղբյուրի փոխանցմամբ՝ ահաբեկիչները հինգ արկ են նետել փախստականների համար նախատեսված ճամբարի վրա, որը գտնվում է Վաֆիդին բնակավայրում։ Զոհեր և վիրավորներ չկան։
Ռուսաստանի Դաշնության պաշտպանության նախարար, բանակի գեներալ Սերգեյ Շոյգուն հայտարարել է, որ ՌԴ նախագահ Վլադիմիր Պուտինի հանձնարարութամբ՝ Արևելյան Գուտայում այսօրվանից՝ փետրվարի 27-ից, կմտցվի հումանիտար դադարի ամենօրյա ռեժիմ՝ առավոտյան 09:00-ից մինչև 14:00-ն։
Վաֆիդին բնակավայրում սիրիական իշխանությունները և Սիրիայում հակամարտող կողմերի հաշտեցման ռուսական կենտրոնը ստեղծել են պայմաններ խաղաղ բնակչությանը միակ հումանիտար միջանցքի միջոցով ընդունելու համար։ Հումանիտար միջանցքը Դամասկոսը կապում է Արևելյան Գուտայի հետ։
Նշված միջանցքի անվտանգությունն ապահովում են սիրիական բանակի զինծառայողները և Ռուսաստանի ռազմական ոստիկանությունը։ Հումանիտար միջանցքի մոտակայքում տեղակայված է հիվանդներին օգնելու համար ժամանակավոր բուժկետ։ Կան նաև ավտոբուսներ՝ խաղաղ բնակչությանը ժամանակավոր կացարաններ տեղափոխելու համար։