Մեծ Բրիտանիան կողմ է հակառուսական պատժամիջոցները երկարաձգելուն

Մեծ Բրիտանիան կողմ է հանդես գալիս Ռուսաստանի նկատմամբ պատժամիջոցները երկարաձգելուն և դիտարկում է լրացուցիչ պատժամիջոցների սահմանման հնարավորությունը, եթե հաստատվի Սոլսբերգում տեղի ունեցած միջադեպում «ռուսական հետքի» տարբերակը։ Այս մասին գրում է Ռիա Նովոստի-ն։

Մարտի 5-ին Ուիլթշիրի ոստիկանությունը հաղորդում էր, որ երկու մարդ ծանր վիճակում տեղափոխվել է հիվանդանոց՝ անհայտ նյութերից ստացած թունավորումներից։ Մեծ Բրիտանիայի ԱԳ նախարար Բորիս Ջոնսոնի համոզմամբ՝ խոսքը ՌԴ գլխավոր հետախուզական վարչության նախկին գնդապետ Սերգեյ Սկրիպալի և նրա դստեր՝ Յուլիայի մասին է։ Սերգեյ Սկրիպալը Մեծ Բրիտանիայում ապաստան է ստացել 2010 թ․՝ Ռուսաստանի և ԱՄՆ-ի միջև հետախույզների փոխանակումից հետո, երբ Ռուսաստանին հանձնվեց 10 մարդ, այդ թվում՝ Աննա Չիպմանը։

Նշելով, որ Ռուսաստանը հաճախ խախտում է միջազգային իրավունքի նորմերը և որպես օրինակ բերելով «Ղրիմի բռնակցումը» և Ուկրաինայում Ռուսաստանի գործողությունները՝ Ջոնսոնն ընդգծել է, որ բրիտանական կառավարությունը մշտապես արձագանքում է նման «խախտումներին»։

ՌԴ Անվտանգության դաշնային ծառայության նախկին սպա Ալեքսանդր Լիտվիենկոն, որը գնացել էր Մեծ Բրիտանիայի, մահացել էր 2006 թ․՝ Միացյալ Թագավորության քաղաքացի դառնալուց հետո։ Նրա ինքնազգացողությունը վատացել էր Անդրեյ Լուգովոյի և Դմիտրի Կովտունի հետ ընդհանուր թեյախմությունից հետո։ Լիտվիենկոյի մահից հետո կատարված էքսպերտիզան ցույց է տվել, որ նրա օրգանիզմում կա մեծ քանակությամբ Պոլոնիում-210 ռադիոակտիվ նյութը։ Այս գործով հիմնական կասկածյալը ռուս բիզնեսմեն և պատգամավոր Անդրեյ Լուգովոյն է, որը հերքում է իր դեմ առաջադրված մեղադրանքները՝ դրանք համարելով բեմադրված։

Մոսկվան բազմիցս հայտարարել է, որ հարուցված քրեական գործը քաղաքականացված է, իսկ հետաքննության ընթացքը թափանցիկ չէ։