Կյանքից հեռացել է Դանիայի թագավորական կոնսերվատորիայի հայազգի պրոֆեսոր Սերգեյ Ազիզյանը

Մարտի 4-ին 60 տարեկան հասակում կյանքից հեռացել է Կոպենհագենի թագավորական կոնսերվատորիայի պրոֆեսոր, ջութակահար Սերգեյ Ազիզյանը։ Այս մասին տեղեկացնում է Դանիայի երաժշտության թագավորական ակադեմիայի պաշտոնական կայքը։

Ազիզյանը ծնվել է 1957 թ․՝ Հայաստանում։ Կրթությունն ստացել է Լենինգրադի (այժմ՝ Սանկտ Պետերբուրգ, - խմբ․) կոնսերվատորիայում։ 1980-1993 թ․թ․ եղել է Լենինգրադի ֆիլհարմոնիկ նվագախմբի կոնցերտմայստերը (նվագախմբի առաջին ջութակահարը, - խմբ․)։

Նա որպես մենակատար երաժիշտ հանդես է եկել Ռուսաստանում, ԱՄՆ-ում, Սկանդինավյան երկրներում, Ճապոնիայում, Կորեայում և Չինաստանում։ 1990-1993 թ․թ․ դասավանդել է Սանկտ Պետերբուրգի կոնսերվատորիայում, 2001 թվականից եղել է Դանիայի թագավորական կոնսերվատորիայի պրոֆեսոր։

Սերգեյ Ազիզյանն իր հետքն է թողել Դանիայի երաժշտական կյանքում։ 2009 թ․ արժանացել է Կառլ Նիելսենի և Աննա-Մարի Կառլ Նիելսենի անվան մրցանակին։