Թրամփի և Կիմ Չեն Ընի բանակցությունների նախապատրաստությունը կտևի մի քանի շաբաթ․ Թիլերսոն
ԱՄՆ նախագահ Դոնալդ Թրամփի և Հյուսիսային Կորեայի ղեկավար Կիմ Չեն Ընի միջև բանակցությունների նախապատրաստությունը կտևի մի քանի շաբաթ։ Այս մասին, ինչպես գրում է Ռիա Նովոստի-ն, հայտարարել է ԱՄՆ պետքարտուղար Ռեքս Թիլերսոնը, որն աշխատանքային այցով այս պահին Ջիբութիում է։
«Սա մի որոշում է, որ նախագահը կայացրել է անձամբ։ Այսօր առավոտյան ես նրա հետ քննարկել եմ այս հարցը, և մենք շատ լավ զրույց ունեցանք», - տեղի ունեցած մամուլի ասուլիսի ժամանակ հայտարարել է Թիլերսոնը։
Ավելի վաղ Հարավային Կորեայի նախագահի՝ ազգային անվտանգության հարցերով խորհրդական Չոն Իյ Յոնը հայտարարել էր, որ Թրամփը համաձայնել է Կիմ Չեն Ընի հետ հանդիպել մինչև առաջիկա մայիս։
Հարավային Կորեայի վարչակազմը հայտնել է նաև, որ հարավկորեական կառավարության պատվիրակության և ԿԺԴՀ-ի առաջնորդ Կիմ Չեն Ընի միջև կայացած բանակցություններից հետո հյուսիսկորեական կողմը հաստատել էր իր հավատարմությունը Կորեական թերակղզու ապամիջուկայնացմանը և հասկացրել, որ իրենք պատճառ չունեն միջուկային զենքին տիրապետելու, եթե ԿԺԴՀ-ի նկատմամբ չլինեն ռազմական սպառնալիքներ և երաշխիքներ տրվեն հյուսիսկորեական ռեժիմի պահպանման համար։