Արևելյան Գուտայում մարտեր են սկսվել զինված խմբավորումների միջև

Արևելյան Գուտայում բախումներ են սկսվել ծայրահեղական տարբեր խմբավորումների միջև։ Այս մասին հայտարարել է Սիրիայում հակամարտող կողմերի հաշտեցման ռուսական կենտրոնի ներկայացուցիչ Վլադիմիր Զոլոտուխինը․ գրում է Ռիա Նովոստի-ն։

Աղբյուրի փոխանցմամբ՝ այն տեղի է ունեցել «Ֆեյլաք ար Ռահման» խմբավորումը «Ջեբաթ ալ-Նուսրա»-ից առանձնացնելու պահանջից հետո։ Այս առաջարկն արվել է կրակի գոտուց դուրս գալը ավելի հեշտ կազմակերպելու համար։

«Փողոցներում բացահայտ մարտեր են ընթանում զինված խմբավորումների միջև։ Խաղաղ բնակչությունը փորձում է թաքնվել պատահական գնդակներին զոհ չդառնալու համար», - ասել է Զոլոտուխինը։

Արևելյան Գուտան Սիրիայի տարածքի վերջին հենակետն է, որտեղ տեղակայվել են «Ջեյշ ալ Իսլամ», «Ջեբհաթ ալ Նուսրա» և «Ահրար ալ Շամ» զինված խմբավորումների անդամները։ Այս շրջանից ահաբեկիչները հաճախ ռմբակոծում են նաև Դամասկոսը։ Վերջին շաբաթների ընթացքում իրավիճակն այստեղ կտրուկ սրվել է։

ՄԱԿ-ի Անվտագության Խորհրդի ընդունած բանաձևից հետո այստեղ սահմանվել են հումանիտար դադարներ։ Ահաբեկիչներին և խաղաղ բնակչությանը դուրս բերելու համար բացվել է երկու հումանիտար միջանցք։ Նախօրեին հաջողվել է դուրս բերել 52 խաղաղ բնակչի, որոնց թվում՝ 26 երեխա։ Այժմ ահաբեկիչները կրկին փորձում են արգելափակել հումանիտար միջանցքները՝ խոչընդոտելով խաղաղ բնակչության դուրսբերումը։