Ռեքս Թիլերսոնն ազատվել է ԱՄՆ պետքարտուղարի պաշտոնից

ԱՄՆ նախագահ Դոնալդ Թրամփը հայտարարել է պետքարտուղարի պաշտոնից Ռեքս Թիլերսոնին ազատելու և նրա փոխարեն Կենտրոնական հետախուզական վարչության ղեկավար Մայք Պոմպեոյին նշանակելու մասին։

Այս մասին Թրամփը գրել է իր թվիթերյան էջում։

Նա նախ հույս է հայտնել, որ Մայք Պոմպեոն գերազանց կաշխատի իր նոր պաշտոնում, ապա շնորհակալություն է հայտնել Թիլերսոնին իր կատարած ծառայության համար։

Կենտրոնական հետախուզաան վարչությունը հետայսու կղեկավարի Պոմպեոյի արդեն նախկին տեղակալ Ջինա Հասփելը։ Նա կլինի առաջին կինը, որը կգլխավորի ԿՀՎ-ն։

Ռեքս Թիլերսոնն ԱՄՆ պետքարտուղարի պաշտոնն զբաղեցրել է նախորդ տարվա փետրվարին։

Ամերիկյան ԶԼՄ-ները մեկ անգամ չէ, որ հաղորդել են պետքարտուղարի աշխատանքից Թրամփի դժգոհ լինելու և նրան աշխատանքից ազատելու պատրաստակամության մասին։

The Washington Post-ի հաղորդմամբ՝ Թրամփի և Թիլերսոնի միջև կային բազմաթիվ տարաձայնություններ՝ կապված Աֆղանստանում ամերիկացի զինառայողների թվի, Կատարի և Կուբայի շրջափակման և մի շարք այլ հարցերի հետ։

Բացի Պոմպեոյից նոր պետքարտուղարի պաշտոնի հավանական թեկնածուների շարքում էր նաև ՄԱԿ-ում ԱՄՆ մշտական ներկայացուցիչ Նիկի Հեյլին։