Ամերիկյան ԶԼՄ-ներում շրջանառվում են Վաշինգտոնի և Փհենյանի միջև գաղտնի կապի մասին լուրեր
Ամերիկյան հետախուզական ծառայությունները գաղտնի կապ են ստեղծել Հյուսիսային Կորեայի հետ, ինչի շնորհիվ հնարավոր է տեղեկատվության փոխանակում կատարել։ Այս մասին հայտնում է Ռիա Նովոստի-ն՝ հղում կատարելով ամերիկյան CBS News-ին։
Աղբյուրի փոխանցմամբ՝ այս ուղղությամբ հիմնական ջանքերը գործադրում է Կենտրոնական հետախուզական վարչությունը՝ կողմ հանդես գալով տեղեկատվության փոխանակման ուղիղ ալիք ստեղծելուն։
Հեռուստաալիքը նշում է, որ ԿՀՎ ղեկավար Մայք Պոպեոն, որը վերջերս նշանակվել է պետքարտուղարի պաշտոնին, աջակցում է «լուռ դիվանագիտության» այս ձևին, որն իրականացվում է գաղտնի ալիքների միջոցով։ Վերջինս հիմնվել է պետքարտուղարության կողմից՝ ՄԱԿ-ի միջոցով։
Հիշեցնենք, որ ավելի վաղ Հարավային Կորեայի նախագահի՝ ազգային անվտանգության հարցերով խորհրդական Չոն Իյ Յոնը հայտարարել էր, որ Թրամփը համաձայնել է Կիմ Չեն Ընի հետ հանդիպել մինչև առաջիկա մայիս։
Հարավային Կորեայի վարչակազմը հայտնել է նաև, որ հարավկորեական կառավարության պատվիրակության և ԿԺԴՀ-ի առաջնորդ Կիմ Չեն Ընի միջև կայացած բանակցություններից հետո հյուսիսկորեական կողմը հաստատել էր իր հավատարմությունը Կորեական թերակղզու ապամիջուկայնացմանը և հասկացրել, որ իրենք պատճառ չունեն միջուկային զենքին տիրապետելու, եթե ԿԺԴՀ-ի նկատմամբ չլինեն ռազմական սպառնալիքներ և երաշխիքներ տրվեն հյուսիսկորեական ռեժիմի պահպանման համար։