Ազատագրվել է Արևելյան Գուտայի տարածքի ավելի քան 65%-ը․ Շոյգու

Վերջին 5 օրերի ընթացքում ազատագրվել է Արևելյան Գուտայի տարածքի 65%-ը։ Այս մասին, ինչպես հայտնում է Ռիա Նովոստի-ն, հայտարարել է Ռուսաստանի պաշտպանության նախարար Սերգեյ Շոյգուն։

Նրա խոսքով՝ հակամարտող կողմերի հաշտեցման ռուսական կենտրոնը կատարում է իր մասշտաբներով եզակի և աննախադեպ հումանիտար գործողություն։

«Վերջին հինգ օրերի ընթացքում Արևելյան Գուտայից հումանիտար միջանցքներով տարհանվել է մոտ 80 հազար մարդ», - ասել է Շոյգուն։

Նա նշել է, որ ռուս զինվորականներն ամենից առաջ զբաղվում են խաղաղ բնակչության անվտանգությունն ապահովելով և նրանց հումանիտար օգնություն հասցնելով։

«Ամենակարճ ժամկետներում հասցվել է 427 տոննա սննդամթերք, շշալցված խմելու ջուր, 7100 ներքնակ և սպիտակեղեն, 21840 բնակչի հասցվել է տաք սնունդ», - նշել է նախարարը։

Նա հայտնել է նաև, որ Դամասկոսի արգելափակված արվարձաններ են ժամանել ՄԱԿ-ի ավտոշարասյուներ՝ 445 տոննա բեռով։

«Չնայած ահաբեկչական խմբավորումները մշտապես փորձում են խաթարել հումանիտար գործընթացները, այնուամենայնիվ, բանակցություններ են տարվում զինյալների հրամանատարության հետ այս աղետալի իրավիճակին վերջ դնելու նպատակով», - շարունակել է Շոյգուն՝ նշելով, որ սիրիական պատերազմի մեջ Ռուսաստանի միջամտությունից հետո ազատագրված տարածքներ են վերադարձել ավելի քան 1 միլիոն 300 հազար սիրիացիներ։

Նախարարի խոսքով՝ վերջին շաբաթվա ընթացքում կանխվել է քիմիական նյութերով սադրանքներ հրահրելու ահաբեկիչների երեք փորձ։