ՌԴ ՊՆ կայքը ենթարկվել է զանգվածային կիբերհարձակումների

ՌԴ պաշտպանության նախարարության պաշտոնական կայքը ենթարկվել է զանգվածային կիբերհարձակման։ Այս մասին, ինչպես գրում է Ռիա Նովոստի-ն, հայտնել են ՊՆ մամուլի ծառայությունից։

Նշվում է, որ հաձակումները տեղի են ունեցել նոր հայրենական զինատեսակների անվանումները որոշելու վերջնական քվեարկության ժամանակ։

Պաշտպանության նախարարությունը ողջ օրվա ընթացքում արձանագրել է 7 հարձակում։ Դրանցից 5-ը եղել է միջին ինտենսիվության, իսկ 2-ը՝ ավելի հզոր։ Հարձակումները կատարվել են Արևմտյան Եվրոպայի, Հյուսիսային Ամերիկայի և Ուկրաինայի տարածքներից։

Համակարգչային անվտանգության ծառայությանը հաջողվել է չեզոքացնել գրոհները։

Պաշտպանական գերատեսչության կայքում առցանց քվեարկությունն ավարտվել է մարտի 22-ին՝ Մոսկվայի ժամանակով 20:00-ին։ Քվեարկության վերջին րոպեներին կայքի դիմումների թիվը հասել է վայրկյանում մի քանի տասնյակ հազարի։ Եվս 600 հազար այցելուներ ամբողջ աշխարհից հետևել են քվեարկության ընթացքին։

Քվեարկության արդյունքում ստորջրյա անօդաչուն ստացել է «Посейдон» անվանումը, մարտական նոր լազերային համալիրը կոչվել է «Пересвет», իսկ միջուկային էներգակայանով թևավոր հրթիռը՝ «Буревестник»։  

Հիշեցնենք, որ այս տարվա մարտի 1-ին ՌԴ նախագահ Վլադիմիր Պուտինը ներկայացրել էր ռուսական նոր սերնդի զինատեսակներ, որոնք առաջինն են աշխարհում։ Դրանցից մեկը «Կինժալ» անունը ստացած հիպերձայնային համալիրն է, որը ձայնի արագությունը գերազանցում է ավելի քան 10 անգամ՝ կարողանալով թիրախին հասնել հաշված րոպեների ընթացքում։ Այս զինատեսակի առանձնահատկությունն այն է, որ կարողանում է մանևրել թռիչքի հետագծի բոլոր հատվածներում՝ շրջանցելով հակաօդային և հակահրթիռային պաշտպանության տան գտնվող գոտիները։ Այն կարող է կրել ինչպես միջուկային, այնպես էլ՝ սովորական մարտագլխիկներ։

ՌԴ նախագահը ներկայացրել էր նաև մեկ այլ հիպերձայնայն համալիր, որը կոչվում է «Ավանգարդ»։ Այս զինատեսակը կարողանում է մթնոլորտի խիտ շերտերով թռչել միջմայրցամաքային հեռավորություններ։ Այն կարողանում է ձայնի արագությունը գերազանցել ավելի քան 20 անգամ։

Մասնագետների համոզմամբ՝ նման զինատեսակները անպիտան են դարձնում ամերիկյան հակաօդային պաշտպանության ողջ համակարգը։