Արևելյան Գուտայից դուրս է բերվել մոտ 1000 ահաբեկիչ
Արևելյան Գուտայի Արբիլ բնակավայրում բացված հումանիտար միջանցքով մարտի 24-ին դուրս են եկել «Ֆեյլաք ալ Ռահման» խմբավորման մոտ հազար զինյալ և նրանց ընտանիքի անդամներ։ Այս մասին հայտնել է ՌԴ պաշտպանության նախարարության կայքը․ գրում է ՏԱՍՍ-ը։
«Սիրիայում հակամարտող կողմերի հաշտեցման ռուսական կենտրոնի և «Ֆեյլաք ալ Ռահման» խմբավորման առաջնորդների միջև տեղի ունեցած բանակցություններից հետո համաձայնություն է ձեռք բերվել զինյալներին Արբիլ բնակավայրով դուրս բերելու մասին։ Մարտի 24-ին հումանիտար միջանցքով Արևելյան Գուտայից դուրս են եկել 988 զինյալ և նրանց ընտանիքների անդամները, որոնք Իդլիբ են հասցվել 17 ավտոբուսներով», - ասվում է ՌԴ ՊՆ տարածած հաղորդագրության մեջ։
Նշվում է, որ ողջ երթուղու ընթացքում զինյալների անվտանգությունն ապահովել են սիրիացի ոստիկանները և Սիրիայում գործող Կարմիր մահիկի ներկայացուցիչները։ Նախօրեին Արևելյան Գուտայի Հարաստա բնակավայրից դուրս էին բերվել ևս հինգ հազար զինյալներ և նրանց ընտանիքների անդամներ։
Մարդասիրական դադարի սկզբից ի վեր հակամարտության գոտին լքել է 106182 մարդ։
Սիրիայում հակամարտող կողմերի հաշտեցման ռուսական կենտրոնի փոխանցմամբ՝ վերջին օրերին Արևելյան Գուտայում մոտ 2600 բնակչի հասցվել է տաք սնունդ և 700 լիտր խմելու ջուր։