Բելգիայի վարչապետը հայտարարել է մեկ ռուս դիվանագետի արտաքսելու մասին

Բելգիան որոշել է երկրից արտաքսել մեկ ռուս դիվանագետի կապված ՌԴ Հետախուզության գլխավոր վարչության նախկին գնդապետ Սերգեյ Սկրիպալի և նրա դստեր՝ Յուլիայի թունավորման դեպքի հետ, որում Մեծ Բրիտանիան մեղադրում է Մոսկվային։ Այս մասին կառավարության՝ Սոլսբերիում տեղի ունեցած դեպքին նվիրված նիստի ավարտին հայտարարել է թագավորության վարչապետ Շառլ Միշելը. գրում է ՏԱՍՍ-ը։

«Մենք ընդամենը որոշել ենք ռուս մեկ դիվանագետի զրկել հավատարմագրումից՝ միևնույն ժամանակ հավատարիմ մնալով Ռուսաստանի հետ մեր հարաբերությունները խորացնելու ցանկությանը», - ասել է Միշելը։

Ինչպես նշվում է վարչապետի հայտարարության մեջ, որոշման մասին Բելգիայում ՌԴ դեսպանին կծանուցվի առաջիկա 48 ժամվա ընթացքում։

«Այն մարդը, որի նկատմամբ կայացվել է տվյալ որոշումը, պետք է լքի Բելգիայի տարածքը 14 օրվա ընթացքում», - ասվում է փաստաթղթում։

Վարչապետնն ընդգծել է Բելգիայի՝ երկխոսության կոչը Մոսկվային՝ նշելով, որ Բրյուսելը, որտեղ գտնվում է ՆԱՏՕ-ի շտաբ-բնակարանը, ամբողջապես աջակցում է դաշինքի որոշումը կազմակերպությունում ՌԴ առաքելության անդամների թվի կրճատման վերաբերյալ։

Հիշեցնենք, որ ավելի վաղ ՆԱՏՕ-ի գլխավոր քարտուղար Յենս Սթոլթենբերգը Բրյուսելում կայացած մամուլի ասուլիսի ժամանակ հայտարարել էր, որ Սոլսբերիում տեղի ունեցած դեպքի պատճառով Հյուսիսատլանտյան դաշինքը կրճատելու է կազմակերպությունում ռուսական առաքելության անձնակազմի թիվը՝ 30-ից այն հասցնելով 20-ի։