Թրամփը Պուտինին առաջարկել է հանդիպել Վաշինգտոնում
ԱՄՆ Նախագահ Դոնալդ Թրամփը Վլադիմիր Պուտինի հետ մարտի 20-ին ունեցած հեռախոսազրույցի ժամանակ ՌԴ առաջնորդին առաջարկել է երկկողմ բանակցություններ անցկացնել Վաշինգտոնում։ Այս մասին հայտնել է ՌԴ նախագահի օգնական Յուրի Ուշակովը։
«Եթե ամեն ինչ նորմալ լինի, չեմ կարծում, թե ամերիկացիները կհրաժարվեն քննարկել բանակցություններ ունենալու իրենց առաջարկը։ Նախագահների հեռախոսազրույցի ժամանակ Դոնալդ Թրամփն առաջարկել է առաջին հանդիպումն անցկացնել Վաշինգտոնում՝ Սպիտակ տանը», - ասել է Ուշակովը։
Նրա խոսքով՝ չի քննարկվել այդ հանդիպումը տարվա առաջին կեսին անցկացնելու հնարավորությունը։
«Այս խոսակցությունից հետո, որը կրում էր կառուցողական և աշխատանքային բնույթ, անդրադարձ է կատարվել շատ հարցերի։ Դրանից հետո տեղի է ունեցել երկկողմ հարաբերությունների հերթական անկումը։ ԱՄՆ-ից արտաքսվեց 60 ռուս դիվանագետ, փակվեց Սիեթլում ՌԴ գլխավոր հյուպատոսարանը։ Ռուսական կողմը ստիպված էր հայելային պատասխան տալ ԱՄՆ-ի գործողություններին», - ընդգծել է Ուշակովը։
Նա նշել է, որ հենց այս պատճառով էլ մարտի 20-ից հետո հադիպման հարցը չի բարձրացվել։
Վլադիմիր Պուտինը և Դոնալդ Թրամփը անձամբ հանդիպել են երկու անգամ։ Նախորդ տարվա հուլիսին երկու երկրների նախագահները բանակցություններ են ունեցել Համբուրգում՝ Մեծ քսանյակի գագաթնաժողովի շրջանակում։ Երկրորդ հանդիպումը տեղի է ունեցել նոյեմբերին Դանանգում՝ Ասիական և խաղաղօվկիանոսյան տնտեսական համագործակցության գագաթնաժողովի շրջանակում։ Դրանից հետո երկու նախագահները բազմաթիվ հեռախոսազրույցներ են ունեցել։
Աղբյուր՝ https://ria.ru/politics/20180402/1517763673.html?referrer_block=index_ma...