Սաուդյան Արաբիան ցանկանում է կղզիացնել Կատարը

Սաուդյան Արաբիայի ներդրողների ֆոնդը ցանկանում է ջրանցք բացել Կատարի հետ սահմանագծով։ Ծրագիրը սպասում է հաստատման և շինարարությունը սկսելու թույլտվության։ Այս մասին գրում է Lenta-ն՝ հղում կատարելով սաուդական Sabq թերթին։

Նշվում է, որ սահմանի երկարությունը 60 կիլոմետր է։ Ջրանցքի ստեղծումը Սաուդյան Արաբիայի արևելյան սահմանը կդարձնի ամբողջովին առափնյա՝ զարգացնելով զբոսաշրջությունը և առևտուրը, ինչպես նաև «կենդանացնելով տարածաշրջանը»։

Բացի այդ՝ նախատեսվում է այստեղ բացել նավթային և արդյունաբերական այլ օբյեկտներ, կառուցել լողափեր և նոր նավահանգիստներ։

Նշվում է, որ շինարարությանը չեն խանգարում տարածքի բնական և սոցիալական առանձնահատկությունները։ Այստեղ չկան լեռնաշղթաներ, բնակավայրեր և գյուղատնտեսական նշանակության հողատարածքներ։

Ըստ ծրագրի՝ ջրանցքի լայնությունը կազմելու է 200 մետր, իսկ խորությունը՝ 15-ից մինչև 20 մետր։ Այն կարողանալու է ընդունել ամեն տեսակի բեռնատար և մարդատար նավեր։

Ծրագրի իրագործման արժեքը նախնական տվյալներով կազմում է 2,8 միլիարդ դոլար։

Աղբյուրի փոխանցմամբ՝ իրավաբանորեն ջրանցքն ամբողջությամբ պատկանելու է Սաուդյան Արաբիային։