Իսրայելի ռազմաօդային ուժերը հրթիռակոծել են սիրիական ավիաբազան
Իսրայելի ռազմաօդային ուժերը հարվածներ են հասցրել Սիրիական Հոմս նահանգի Տիֆոր ավիաբազային։ Այս մասին, ինչպես գրում է Ռիա Նովոստի-ն, հայտարարել են ՌԴ պաշտպանության նախարարությունում։
Նշվում է, որ հարձակումը կատարվել է ապրիլի լույս 9-ի գիշերը՝ Երևանի ժամանակով 04:25-ից 04:53-ի սահմաններում։
«Իսրայելական ռազմաօդային ուժերին պատկանող երկու F-15 ինքնաթիռներ, չխախտելով Սիրիայի օդային սահմանները, Լիբանանի տարածքից 8 կառավարվող հրթիռներով հարվածներ են սկսել ավիաբազայի ուղղությամբ», - նշվում է ՌԴ ՊՆ հայտարարության մեջ։
Ռուս զինվորականների հաղորդմամբ՝ հրթիռներից երեքը հասել են մինչև ավիաբազայի արևմտյան հատված։ Սիրիայի հակաօդային պաշտպանության համակարգերին հաջողվել է խոցել մնացած 5 հրթիռները։
Իսրայելական կողմը հրաժարվել է մեկնաբանել այս տեղեկությունը։
Այս տարվա փետրվարին իսրայելական ռազմաօդային ուժերը կրկին ռմբակոծել էին T-4 ավիաբազան, որտեղ, նրանց պնդմամբ, գտնվում է իրանական անօդաչու սարքերի կառավարման կենտրոնը։ Այդ ժամանակ ցամաքից կատարված հարվածով վնասազերծվել էր F-16 կործանիչը։