Սիրիայում գնդակոծության է ենթարկվել ռուս լրագրողներին տեղափոխող ավտոբուսը
Սիրիայում ռմբակոծության է ենթարկվել ռուս լրագրողներին տեղափոխող ավտոբուսը, որը վերադառնում էր Արևելյան Գուտայից։ Այս մասին հայտնում է ՌԴ պաշտպանության նախարարությունը։
«Ապրիլի 11-ին ժամը 18:20-ի սահմաններում անհայտ անձինք գնդակոծել են Արևելյան Գուտայում տիրող իրավիճակի մասին ռեպորտաժ պատրաստելուց հետո այնտեղից վերադարձող ռուս լրագրողներին տեղափոխող ավտոբուսը», - ասվում է ՌԴ ՊՆ հաղորդագրության մեջ։
Աղբյուրի փոխանցմամբ՝ մարմնական թեթև վնասվածքներ են ստացել НТВ հեռուստաալիքի թղթակից Ալեքսեյ Իվլյովը, Россия 1 հեռուստաալիքի օպերատոր Միխայիլ Վիտկինը և Звезды հեռուստաալիքի օպերատոր Վլադիսլավ Դոդոնովը։
«Վիրավորված լրագրողներն անմիջապես տեղափոխվել են Սիրիայում հակամարտող կողմերի հաշտեցման ռուսական կենտրոնի բուժկետ, որտեղ նրանք ստացել են համապատասխան բուժօգնություն։ Լրագրողների կյանքին վտանգ չի սպառնում», - նշվում է տարածված հաղորդագրության մեջ։
Գնդակոծության տակ է ընկել նաև РЕН ТВ հեռուստաալիքի թղթակից Վալենտին Տրուշնինը, որը պատմել է տեղի ունեցածի մանրամասների մասին։
«Մենք եկանք Դումա, կախեցինք դրոշները։ Բոլորն ուրախանում էին, խաղաղ բնակիչները ողջունում էին զինվորականներին, ամեն ինչ լավ էր։ Հետո եկավ հեռանալու ժամանակը, և մենք նստեցինք ավտոբուս։ Այնուհետև լսվեցին կրակոցներ․ չափազանց շատ կրակոցներ։ Պարզվեց՝ օդ էին կրակում։ Զինյալներն այդպիսով ցրում էին խաղաղ բնակչությանը, որպեսզի իջեցնեին դրոշները», - ասել է Տրուշինը։
Ավելի վաղ ՌԴ Գլխավոր շտաբի Օպերատիվ կառավարման կենտրոնի ղեկավարի առաջին տեղակալ, գեներալ-լեյտենանտ Վիկտոր Պոզնիխիրը հայտնել էր, որ վերջին հինգ օրերի ընթացքում Արևելյան Գուտայում ահաբեկիչների կողմից չի եղել ոչ մի զինված սադրանք։
Աղբյուր՝ https://ria.ru/syria/20180411/1518424567.html?referrer_block=index_main_4