ՌԴ հատուկ ծառայությունները ձերբակալել են ԻՊ զինյաների, որոնք պատրաստվում էին ահաբեկչություններ իրականացնել Ռոստովում

ՌԴ Անվտանգության դաշնային ծառայությունը բացահայտել և վնասազերծել է «Իսլամական պետություն» ահաբեկչական խմբավորման անդամներից բաղկացած մի խմբի, որը պատրաստվում էր Սիրիայում գտնվող իր ղեկավարության հրահանգով ահաբեկչություններ իրականացնել Ռոստովի շրջանում։ Այս մասին, ինչպես գրում է ՏԱՍՍ-ը, հայտնել է ԱԴԾ մամուլի կենտրոնը։

Նշվում է, որ վնասազերծման ժամանակ խմբի առաջնորդը գործարկել է պայթուցիկ սարք և զոհվել։ Հաջողվել է ձերբակալել խմբի ևս երեք անդամների։

«Անվտանգության դաշնային ծառայությունը բացահայտել և վնասազերծել է «Իսլամական պետություն» ահաբեկչական խմբավորման զինյալների մի խմբի, որը Սիրիայում գտնվող հրամանատարների հրահանգներով պատրաստվում էր ինքնաշեն պայթուցիկ սարքերի և հրացանների կիրառմամբ ահաբեկչական գործողություններ իրականացնել Ռոստովի շրջանում», - ասվում է ԱԴԾ հայտարարության մեջ։

Հաղորդվում է, որ ձերբակալված երեք զինյալների մոտից խուզարկությամբ հայտնաբերվել են կապի միջոցներ, պայթուցիկ սարքեր և այլ զինատեսակներ։

«Օպերատիվ գործողության ընթացքում ահաբեկիչների խմբի ղեկավարը գործարկել է պայթուցիկ սարք, ինչի արդյունքում ստացել է կյանքի հետ անհամատեղելի վնասվածքներ», - նշում են ԱԴԾ-ում։