ԱՄՆ Կոնգրեսի Ներկայացուցիչների պալատն արգելել է ֆինանսական օգնություն տրամադրել Սիրիային
ԱՄՆ Կոնգրեսի Ներկայացուցիչների պալատն ընդունել է մի օրինագիծ, որով արգելվում է ֆինանսական որևէ օգնություն տրամադրել Բաշար Ասադի իշխանության տակ գտնվող Սիրիայի վերակառուցմանը։ Այս մասին ասվում է Կոնգրեսի ստորին պալատի միջազգային հարցերի հանձնաժողովի մամուլի հաղորդագության մեջ։
Երկու կուսակցությունների հավանությանն արժանացած փաստաթղթում նշվում է, որ ԱՄՆ-ը թույլ չի տա, որ ամերիկացի հարկատուների վճարած գումարները հայտնվեն Ասադի և նրա դաշնակիցների ձեռքում։
Փաստաթղթի շուրջ լսումներից առաջ հանրապետական կոնգրեսական Էդվարդ Ռոյսը ելույթ էր ունեցել և հերթական անգամ մեղադրել Իրանին և Ռուսաստանին Ասադին աջակցելու համար՝ նշելով, որ յոթ տարվա պատերազմի ընթացքում այս պետությունները Սիրիայի ժողովրդին հասցրել են աղետալի վիճակի։
«Այս իրավիճակում Ասադի վերահսկողության տակ գտնվող շրջանների վերակառուցման համար ԱՄՆ-ի պետական միջոցներից գումար տրամադրելը կլինի անմտություն», - ասել է կոնգրեսականը՝ ևս մեկ անգամ ընդգծելով, որ Ասադը ոչ մի ֆինանսական աջակցություն չի ստանա ԱՄՆ-ից։
Այժմ Սիրիայի ֆինանսական օգնություն չտրամադրելու մասին օրինագիծը պետք է հավանության արժանանա նաև Սենատում։