Ահաբեկիչները գրոհել են սիրիական բանակի դիրքերը
Սիրիայի կառավարական զորքերը «Սիրիական ազատ բանակ» զորամիավորման հետ միասին հետ են մղել «Ջեբհաթ ալ Նուսրա» ահաբեկչական խմբավորման գրոհները։ Այս մասին հայտնում է Սիրիայում հակամարտող կողմերի հաշտեցման ռուսական կենտրոնը։
Ռիա Նովոստի-ի փոխանցմամբ՝ այսօր՝ հունիսի 23-ին, «Ջեբհաթ ալ Նուսրա» ահաբեկչական խմբավորման մոտ հազար զինյալներ Դամա և Դեյր Դամա բնակավայրերի մոտ գրոհել են 9-րդ տանկային դիվիզիայի դիրքերը։ Այժմ Սիրիայի կառավարական ուժերը շարունակում են պաշտպանական մարտերը։ Ահաբեկիչների գործողությունների հետևանքով զոհվել է սիրիական բանակի 5 զինվոր, վիրավորվել՝ 19-ը։ Հարվածների տակ են ընկել նաև տեղի խաղաղ բնակիչները։
Տարածված հաղորդագրության մեջ նշվում է, որ հարձակումը կանխելու համար կառավարական զորքերից օգնություն են խնդրել «Սիրիական ազատ բանակ»-ի հրամանատարները, որոնք նախօրեին հայտնել էին օրինական իշխանությունների կողմն անցնելու մասին։
Հատկանշական է, որ կառավարական զորքերի կողմն անցնելու գործընթացը տեղի է ունեցել Սիրիայում հակամարտող կողմերի հաշտեցման ռուսական կենտրոնի միջոցով։
Աղբյուր՝ https://ria.ru/syria/20180623/1523274535.html?referrer_block=index_main_3