ԱՄՆ-ը փորձելու է Հնդկաստանին համոզել չգնել ռուսական Ս-400 համակարգը

Միացյալ Նահանգները փորձելու է Հնդաստանին համոզել գնել ամերիկյան հակադօային պաշտպանության համակարգեր՝ այդպիսով փորձելով կանխել Դելիի կողմից ռուսական Ս-400 զենիթահրթիռային համակարգերի ձեռքբերումը։ Այս մասին գրում է Lenta-ն՝ հղում կատարելով The Economic Times-ին։

Աղբյուրի փոխանցմամբ՝ նման առաջարկ կարող է հնչել Հնդկաստանի արտաքին գործերի և պաշտպանության նախարարների՝ ԱՄՆ պետքարտուղար Մայք Պոմպեոյի և Պենտագոնի ղեկավար Ջեյմս Մեթիսի հետ հուլիսի 6-ին Վաշինգտոնում կայանալիք հանդիպան ժամանակ։ Ամերիկացի պաշտոնյաներն, ամենայն հավանականությամբ, հնդիկ գործընկերներին կառաջարկեն Ս-400-ի փոխարեն ձեռք բերել ամերիկյան THAAD հակահրթիռային պաշտպանության համակարգը։

«Արդյունավետության տեսանկյունից ռուսական զենիթահրթիռային համակարգերն ավելի լավն են և ընդգրկում են ավելի շատ օդային տարածք, քան ամերիկյան համակարգերը։ THAAD համակարգը լավ է գործում բարձր հեռահարության հրթիռների դեմ, սակայն պարզ չէ, թե ինչպես այն իրեն կդրսևորի միջմայրցամաքային բալիստիկ հրթիռների կամ միջին հեռահարության հրթիռների դեպքում», - գրում է The Economic Times-ը։

Մայիսի վերջին հաղորդվում էր, որ Մոսկվան պատրաստվում է Հնդկաստանին տրամադրել մի քանի Ս-400 համակարգեր՝ ընդհանուր շուրջ 6 միլիարդ դոլարի չափով։ Նշվում էր, որ գործարքն արդեն եզրափակիչ փուլում է։

Բացի Հնդկաստանից, այս համակարգով հետաքրքրված է նաև Թուրքիան և Կատարը։