ՆԱՏՕ-ում հույս ունեն, որ Թուրքիան և ԱՄՆ-ը կհարթեն Ս-400-ի շուրջ ծագած տարաձայնությունը

ՆԱՏՕ-ն հույս ունի, որ Թուրքիան և Միացյալ Նահանգները կկարգավորեն իրենց տարաձայնությունը՝ կապված Անկարայի կողմից ռուսական Ս-400 համակարգի ձեռքբերման հետ։ Այս մասին ՏԱՍՍ-ի թղթակցի հետ զրույցում հայտարարել է Հյուսիսատլանտյան դաշինքի ներկայացուցիչը։

«Մենք հույս ունենք, որ Թուրքիայի և ԱՄՆ-ի տարաձայնությունը կհարթվի դաշնակցային համերաշխության մթնոլորտում», - ասել է ՆԱՏՕ-ի ներկայացուցիչը։

Նրա խոսքով՝ Դաշինքի անդամ յուրաքանչյուր պետություն ինքնուրույն է որոշում, թե ինչ զինտեխնիկա ձեռք բերի։

«Մեզ համար կարևորն այն է, որ այդ զինտեխնիկան համատեղելի լինի ՆԱՏՕ-ում եղածների հետ։ Այլ պետություններից սարքավորումների ձեռքբերումը, ընդհանուր առմամբ, բարձրացնում է օպերատիվ համատեղելիությունը և անվտանգությունը, այդ իսկ պատճառով՝ մենք ողջունում ենք դաշնակիցների միջև յուրաքանչյուր գործարք, որը նպատակ ունի բարձրացնել Դաշինքի պոտենցիալը», - նշում է ներկայացուցիչը։

Միացյալ Նահանգները և ՆԱՏՕ-ն բազմիցս քննադատել են Թուրքիային այս համաձայնագրի համար։ ԱՄՆ պետքարտուղարի օգնական Ուես Միթչելի խոսքով՝ Ս-400-ի ձեռքբերումը կարող է բացասականորեն ազդել ամերիկյան Ֆ-35 կործանիչների՝ Թուրքիա մատակարարման վրա։

Ի պատասխան՝ Անկարան հայտարարել է, որ միջոցներ կձեռնարկի, եթե Միացյալ Նահանգները փորձի կենսագործել հնչեցրած սպառնալիքները։

Հիշեցնենք, որ նախորդ տարվա սեպտեմբերի 12-ին Թուրքիայի նախագահ Ռեջեփ Թայիփ Էրդողանը հայտարարել էր, որ Մոսկվայի հետ արդեն կնքվել է Ս-400-ի գնման համաձայնագիրը, և նույնիսկ կանխավճար է տրվել։ Սեպտեմբերի վերջին այս լուրը հաստատել էր նաև ՌԴ նախագահի՝ ռազմատեխնիկական համագործակցութան հարցերով օգնական Վլադիմիր Կոժինը՝ ընդգծելով, որ այդ հարցն արդեն «չի քննարկվում»։

Նշենք, որ առաջին անգամ Թուրքիան Ս-400 համակարգով հետաքրքրվել է դեռ 2009 թվականին: Այն ժամանակ, սակայն, համագործակցությունը դադարեցվել է: