Թուրքիայի դատախազությունը հրահանգել է ձերբակալել զինված ուժերի 68 սպայի

Անկարայի դատախազությունը Գյուլենական շարժման դեմ անցկացվող հետաքննության շրջանակներում ձերբակալության հրահանգ է արձակել Թուրքիայի ցամաքային զորքերի 68 անդամների նկատմամբ։ Այս մասին գրում է ՏԱՍՍ-ը՝ հղում կատարելով թուրքական NTV-ին։

Նշվում է, որ ձերբակալություններն սկսվել են հուլիսի 2-ի առավոտյան Անկարայում և Թուրքիայի 18 այլ նահանգներում։ Ձերբակալվածներից 19-ը գործող զինվորականներ են, իսկ մնացածը՝ ժամանակավորապես ակտիվ ծառայությունից դուրս են։ Նրանք բոլորը սպայական անձնակազմի անդամներ են։ Հետաքննություն իրականացնող մարմինը վերջիններիս կասկածում է Գյուլենական շարժման անդամ լինելու և զինված ուժերի կազմում գյուլենական ակտիվ գործունեություն ծավալելու մեջ։

Հիշեցնենք, որ 2016 թ․ հուլիսի 15-ին Թուրքիայում զինվորականները հեղաշրջման փորձ են կազմակերպել։ Ոստիկանությանը հաջողվել էր ճնշել ապստամբներին, և հեղաշրջման փորձը ձախողվել էր։ Թուրքիայի իշխանությունները հեղաշրջման փորձի կազմակերպման մեջ մեղադրում են Թուրքիայում արդի իսլամական գաղափարախոսության հիմնադիր Ֆեթուլլահ Գյուլենին, որը 1998 թվականից բնակվում է ԱՄՆ-ում։ Թուրքիայի նախագահ Էրդողանն ԱՄՆ-ի իշխանություններից մի քանի անգամ պահանջել է Գյուլենին ձերբակալել և արտահանձնել Թուրքիային, սակայն մերժում է ստացել։ Ըստ ամերկյան կողմի՝ Թուրքիայի իշխանությունները չեն տրամադրել հեղաշրջման փորձին Գյուլենի մասնակցության վերաբերյալ բավարար ապացույցներ։  

Հեղաշրջման փորձից հետո Թուրքիայում ձերբակալվել է ավելի քան 50 հազար մարդ, աշխատանքից հեռացվել՝ շուրջ 140 հազար պետաշխատող։