Աֆղանստանի արևելքում ոչնչացվել է Իսլամական պետության շուրջ 25 զինյալ

Աֆղանստանի զինված ուժերի՝ երկրի արևելյան շրջաններում կատարած գործողությունների արդյունքում ոչնչացվել է «Իսլամական պետություն» ահաբեկչական խմբավորման շուրջ 25 զինյալ։ Այս մասին գրում է Ռիա Նովոստի-ն՝ հղում կատարելով աֆղանական 1TV լրատվականին։

Աղբյուրի փոխանցմամբ՝ աֆղանական Աչինի շրջանում սպանվել են ԻՊ 23 զինյալներ, որոնց թվում՝ այդ խմբի ղեկավարը։

Եվս երկու ահաբեկչի հաջողվել է ոչնչացնել Հասքա Մինա նահանգում անօդաչու թռչող սարքերի գործադրման շնորհիվ։

Վերջին շրջանում Աֆղանստանում իրավիճակը նշանակալիորեն սրվել է։ «Թալիբան» ծայրահեղական խմբավորումը, որն իր տիրապետության տակ է պահում երկրի գյուղատնտեսական նշանակության բավական մեծ տարածքներ, վերջերս սկսել է գրոհել խոշոր քաղաքները։ Այս երկրի տարածքում մեծացել է նաև «Իսլամական պետություն» ահաբեկչական խմբավորման ազդեցությունը։