Հրաժարական է տվել Մեծ Բրիտանիայի արտաքին գործերի նախարար Բորիս Ջոնսոնը

Մեծ Բրիտանիայի արտաքին գործերի նախարար Բորիս Ջոնսոնը հրաժարական է տվել։ Այս մասին գրում է Ռիա Նովոստի-ն՝ հղում կատարելով Մեծ Բրիտանիայի կառավարությանը։

«Օրվա երկրորդ կեսին վարչապետ Թերեզա Մեյն ընդունել է արտաքին գործերի նախարարի պաշտոնից հրաժարական տալու մասին Բորիս Ջոնսոնի դիմումը։ Վարչապետը Ջոնսոնին շնորհակալություն է հայտնել կատարած աշխատանքի համար։ Մոտ ժամանակներս հայտնի կդառնա, թե ով է լինելու Մեծ Բրիտանիայի նոր արտգործնախարարը», - գրում է Ռիա Նովոստի-ն։

Աղբյուրը նշում է, որ սա այսօրվա ընթացքում երկրորդ հրաժարականն է։ Ավելի վաղ հրաժարական էր տվել նաև Brexit-ի հարցերով նախարար Դևիդ Դևիսը։

Երկու նախարարներն էլ հրաժարական են տվել Brexit-ի շուրջ վերջերս բրիտանական կառավարությունում ստեղծված լարված իրավիճակի ֆոնին։ Բորիս Ջոնսոնը և Դևիդ Դևիսը կողմ էին «կոշտ Brexit-ին»։

Ռիա Նովոստի-ն հիշեցնում է, որ հուլիսի 6-ին Թերեզա Մեյը հայտարարել էր Եվրոպական Միության կազմից Մեծ Բրիտանիայի դուրս գալու պայմանները մեղմացելու մասին։ Վարչապետը հայտարարել էր, որ Միացյալ Թագավորությունը Բրյուսելին կառաջարկի ստեղծել ազատ առևտրի գոտի և կազմել արդյունաբերական և գյուղատնտեսական ապրանքների ցուցակ, որոնք չեն ընկնի հետագա սահմանափակումների տակ։

Brexit-ի ավելի կոշտ մոտեցման կողմնակիցներին դուր չէր եկել Մեյի այս ծրագիրը։ Նրանց կարծիքով՝ այս ծրագրի իրագործմամբ կպահպանի Միացյալ Թագավորության կախվածությունը ԵՄ-ից և վնաս կհասցվի տեղի արտադրողներին։

Բրյուսելի հետ Brexit-ի հարցով բանակցություններին Լոնդոնի պաշտոնական դիրքորոշումն արտահայտող փաստաթուղթը (white paper) պետք է հրապարակվի հաջորդ շաբաթ։