Աֆղանստանի մայրաքաղաքում տեղի ունեցած ահաբեկչության հետևանքով զոհվել է 7 մարդ
Աֆղանստանի մայրաքաղաք Քաբուլում՝ վերականգնման և գյուղական շրջանների զարգացման նախարարության շենքի մոտ մահապարտ-ահաբեկիչի իրականացրած պայթյունի հետևանքով զոհվել է 7 մարդ, վիրավորվել՝ ավելի քան 15-ը։ Այս մասին հայտնել է Աֆղանստանի ոստիկանությունը։
Ավելի վաղ ոստիկանությունից տեղեկացնում էին, որ տեղի ունեցած պայթյունի հետևանքով վիրավորվել է շուրջ տասը մարդ, կան նաև զոհեր։
Աֆղանստանի ոստիկանության մամուլի ծառայության փոխանցմամբ՝ դեպքը տեղի է ունեցել օրվա երկրորդ կեսին նախարարության մուտքի մոտ։ Մահապարտ-ահաբեկիչը պայթուցիկ սարքը գործարկել է այն ժամանակ, երբ նախարարության աշխատակիցները դուրս էին գալիս շենքից։
Հատկանշական է, որ տարածաշրջանում հայտնի ահաբեկչական որևէ խմբավորում դեռ չի ստանձնել տեղի ունեցած հարձակման պատասխանատվությունը։