Թրամփը կարծում է, որ Ռուսաստանն ամերիկյան ընտրություններին միջամտում է ի օգուտ դեմոկրատների․ Սպիտակ տուն

ԱՄՆ նախագահ Դոնալդ Թրամփը կասկածում է, որ Ռուսաստանն ամերիկյան ընտրություններին միջամտում է ի օգուտ դեմոկրատների։ Այս մասին հայտարարել է Սպիտակ տան մամուլի ծառայության ղեկավարի տեղակալ Հոգան Գիդլին։

Ավելի վաղ Թրամփը թվիթերյան գրառման միջոցով հայտարարել էր, որ «ռուսական միջամտությունն» ի օգուտ դեմոկրատների է։ Լրագրողները Սպիտակ տան ներկայացուցիչներին հարցրել էին, թե իրոք Թրամփն այդպես է մտածում, և սա ապացուցող ինչ փաստեր կան։

«Թրամփը խոսում է մեր ընտրություններին մշտական միջամտության մասին․ նա կարծում է, որ դա տեղի է ունեցել։ Թրամփը կարծում է, որ ռուսները միջամտում են դեմոկրատների օգտին։ Նրանք ընդդիմադիր կուսակցություն են։ Իր թվիթերյան գրառումներում Թրամփը հենց սա նկատի ուներ», - հայտարարել է Գիդլին։

Վերջին երկու տարվա ընթացքում դեմոկրատները Թրամփին մեղադրում էին Ռուսաստանի հետ դավադրության մեջ լինելու համար։

Այս տարվա նոյեմբերի 6-ին ԱՄՆ Կոնգրեսում տեղի են ունենալու միջանկյալ ընտրություններ, որոնց ընթացքում ընտրվելու են ներկայացուցիչների պալատի ամբողջական կազմը և սենատի 35 անդամներ։

Ամերիկյան նախագահական ընտրություններին ռուսական ենթադրյալ միջամտության գործով զբաղվում է հատուկ դատախազ Ռոբերտ Մյուլլերը։ Այս գործով լսումներ են անցկացվում նաև Ներկայացուցիչների պալատի՝ հետախուզության հարցերով հանձնաժողովում։