Եվրամիությունը զիջումների է գնացել ԱՄՆ-ի հետ առևտրային պատերազմում

ԱՄՆ նախագահ Դոնալդ Թրամփը Եվրահանձնաժողովի ղեկավար Ժան Կլոդ Յունկերի հետ բանակցությունների ընթացքում Բյուսելի կողմից որոշ զիջումներ է ստացել առևտրային պատերազմից խուսափելու համար։

Այս մասին գրում է The Wall Street Journal-ը։

«Բրյուսելը համաձայնել է դիտարկել ԱՄՆ-ից հեղուկ գազի ներկրման ծավալների ավելացման հնարավորությունը, նվազեցնել արդյունաբերական մաքսատուրքերը, համապատասխանեցնել բժշկական օգտագործման մթերքների չափանիշները, ինչպես նաև մեծացնել սոյայի ներկրման ծավալները», - գրում է թերթը։

Աղբյուրի հավաստմամբ՝ ԱՄՆ-ի և ԵՄ-ի պատվիրակությունները դեռ աշխատում են առևտրային բանակցությունների արդյունքներն ամփոփող համատեղ հայտարարության վրա։ Այն վերաբերելու է ԱՄՆ-ի կողմից ավտոմեքենաների ներկրման մաքսատուրքերի սահմանման հարցին։

Այս տեղեկությունն ավելի ուշ հաստատել է նաև անձամբ ԱՄՆ առաջնորդը։

«Մենք հանդիպել ենք Սպիտակ տանը, որպեսզի սկիզբ դնենք մեր հարաբերությունների նոր փուլին․ այն ամուր հարաբերությունների, որից կշահեն երկու կողմերն էլ», - Յունկերի հետ հանդիպումից հետո ասել է Դոնալդ Թրամփը։

«ԵՄ-ը ցանկանում է ավելացնել ԱՄՆ-ից հեղուկ գազի ներմուծման ծավալները։ Այն դառնալու է շատ խոշոր գնորդ», - հավելել է ԱՄՆ նախագահը։

Նա ընդգծել է նաև, որ Եվրամիությունն «անմիջապես ավելացնելու է ամերիկյան սոյայի ներկրման ծավալները»։

Հիշեցնենք, որ ավելի վաղ ԱՄՆ նախագահ Դոնալդ Թրամփը սպառնացել էր խոշոր մաքսատուրքեր սահմանել Եվրոպական Միությունից ավտոմեքենաերի ներկրման վրա։ Եվրահանձնաժողովն, իր հերթին, խոստացել էր պատասխան միջոցներ ձեռնարկել։