ԱՄՆ Կոնգրեսում դեմ են Պուտինի և Թրամփի «գաղտնի հանդիպումներին»

ԱՄՆ Կոնգրեսում դեմ են Դոնալդ Թրամփի և Վլադիմիր Պուտինի «գաղտնի հանդիպումների» անցկացմանը։

Ներկայացուցիչների պալատի անդամ, դեմոկրատական կուսակցության ներկայացուցիչ Շեյլա Ջեկսոն Լին խորհրդարանի քննարկմանն է ներկայացրել մի օրինագիծ, որը դատապարտում է «Պուտինի և Թրամփի միջև հետագայում որևէ գաղտնի հանդիպման կազմակերպումը»։

Փաստաթղթի հեղինակը ԱՄՆ առաջնորդին կոչ է անում նաև Կոնգրեսի հետ համաձայնեցնել բոլոր պայմանավորվածությունները, որոնք ձեռք են բերվել Պուտինի հետ Հելսինկիում կայացած հանդիպման ժամանակ։

«ԱՄՆ ներկայացուցիչների պալատը նախագահ Թրամփին կոչ է անում Կոնգրեսին ներկայացնել Պուտինի հետ Հելսինկիում կայացած հանդիպմանը ձեռք բերված ցանկացած համաձայնություն և պայմանավորվածություն», - ասվում է փաստաթղթում։

Նշվում է նաև, որ Պուտինի և Թրամփի միջև կնքված բոլոր համաձայնագրերը «բավարարում են Կրեմլի շահերը»։

Հիշեցնենք, որ հուլիսի 16-ին Ֆինլանդիայի մայրաքաղաք Հելսինկիում տեղի է ունեցել Դոնալդ Թրամփի և Վլադիմիր Պուտինի հանդիպումը։ Սա երկու նախագահների լիարժեք ձևաչափով առաջին հանդիպումն էր։ Երկու երկրների առաջնորդներն էլ հայտարարել են, որ չափազանց մեծ քայլ է կատարվել առաջ։

Ավելի վաղ երկու նախագահները հանդիպել էին երկու անգամ՝ 2017 թ․ հուլիսին և նոյեմբերին՝ միջազգային խոշոր միջոցառումների շրջանակներում։

Աղբյուր՝  https://ria.ru/world/20180728/1525531945.html?referrer_block=index_main_1