Թրամփը համաձայն է այցելել Մոսկվա

ԱՄՆ նախագահ Դոնալդ Թրամփը համաձայն է մեկնել Մոսկվա։ Այս մասին գրում է Lenta-ն՝ հղում կատարելով Reuters գործակալությանը։

Աղբյուրի փոխանցմամբ՝ ԱՄՆ առաջնորդը Մոսկվա կմեկնի պաշտոնական հրավերն ստանալուց հետո։

«Նախագահ Թրամփն անհամբերությամբ է սպասում Պուտինի այցին Վաշինգտոն, որը տեղի կունանա հաջորդ տարվա սկզբին։ Նա նաև պատրաստ է մեկնել Մոսկվա, եթե ստանա պաշտոնական հրավեր», - ասել է Սպիտակ տան մամուլի ծառայության ղեկավար Սառա Սանդերսը։

Lenta-ն հիշեցնում է, որ ավելի վաղ՝ հուլիսի 27-ին, ՌԴ նախագահ Վլադիմիր Պուտինն ամերիկյան կողմին հրավեր էր ուղարկել։

ՌԴ առաջնորդը Հարավաֆրիկյան Հանրապետությունում կայացած ԲՐԻԿՍ-ի գագաթնաժողովում ունեցած մամուլի ասուլիսի ժամանակ, խոսելով Թրամփի հետ հարաբերությունների մասին, նշել է, որ վերջինս տրամադրված է հետագա «օգտակար» հանդիպումներին։

Հիշեցնենք, որ հուլիսի 16-ին Ֆինլանդիայի մայրաքաղաք Հելսինկիում տեղի է ունեցել Դոնալդ Թրամփի և Վլադիմիր Պուտինի հանդիպումը։ Սա երկու նախագահների լիարժեք ձևաչափով առաջին հանդիպումն էր։ Երկու երկրների առաջնորդներն էլ հայտարարել են, որ չափազանց մեծ քայլ է կատարվել առաջ։

Ավելի վաղ երկու նախագահները հանդիպել էին երկու անգամ՝ 2017 թ․ հուլիսին և նոյեմբերին՝ միջազգային խոշոր միջոցառումների շրջանակներում։