Թրամփը պատրաստ է առանց նախապայմանների հանդիպել Իրանի նախագահի հետ
ԱՄՆ նախագահ Դոնալդ Թրամփը պատրաստ է առանց նախապայմանների հանդիպել Իրանի նախագահ Հասան Ռոհանիի հետ։ Այս մասին Իտալիայի վարչապետ Ջուզեպպե Կոնտեի հետ Սպիտակ տանն ունեցած համատեղ մամուլի ասուլիսի ընթացքում հայտարարել է ԱՄՆ նախագահը։
«Ես իհարկե կհանդիպեմ Իրանի նախագահի հետ, եթե նրանք ցանկություն ունենան։ Չգիտեմ՝ արդյոք նրանք այժմ պատրաստ են, քանի որ նրանք հայտնվել են բարդ իրավիճակում», - ասել է Թրամփը՝ ընդգծելով, որ պատրաստ է հանդիպմանը ոչ թե թույլ կամ ուժեղ լինելու, այլ այն բանի համար, որ նման ձևաչափի խորհրդակցությունները նպատակահարմար են։
«Եթե մեզ հաջողվի պայմանավորվել ինչ-որ կարևոր բանի շուրջ, այլ ոչ թե թղթերի փոխանակման, ապա ես պատրաստ եմ հանդիպելու», - շարունակել է Թրամփը։
Նա նշել է նաև, որ չի պատրաստվում հանդիպման համար որևէ նախապայման առաջադրել Թեհրանին:
Մայիսի 21-ին ԱՄՆ պետքարտուղար Մայք Պոմպեոն հայտարարել էր, որ Վաշինգտոնը պատրաստվում է աննախադեպ ճնշում գործադրել Թեհրանի նկատմամբ և սահմանել ամենախիստ պատժամիջոցները, եթե վերջինս չփոխի քաղաքական դիրքորոշումը։ Նա 12 նախապայման էր առաջադրել իրանական միջուկային ծրագրի նոր համաձայնագրի համար։