Պայթյուն՝ Բոլոնյայի օդանավակայանի մոտակայքում

Իտալական Բոլոնյա քաղաքի մերձակա մայրուղում ցիստեռնի և ևս մի քանի մեքենաների պայթյունի հետևանքով տուժել է ավելի քան 20 մարդ։ Այս մասին տեղեկացնում է Rai News 24 հեռուստաալիքը։

La Repubblica թերթի փոխանցմամբ՝ պայթյունի պատճառ է դարձել այն, որ Բոլոնյայի օդանավակայանի մոտակայքում վթարվել է բեռնատարը, ինչի հետևանքով բռնկվել և այրվել են նշված ցիստեռնով տեղափոխվող քիմիական նյութերը։

Կրակը տարածվել է մոտակա կայանատեղիում կանգնած մեքենաների վրա։ Դրանցից մի քանիսը նույնպես պայթել են։

Դեպքի վայր են ժամանել ոստիկանության, շտապօգնության ծառայության և հրշեջ ծառայության խմբեր։ Փակ են մոտակա ճանապարհները։

Օդանավակայանի ղեկավար կազմից հայտնում են, որ պայթյունը չի ազդել իրենց աշխատանքի վրա․ ինքնաթիռները ժամանում և մեկնում են ըստ ժամանակացույցի։