Պուտինը և Թրամփը չեն քննարկել պատժամիջոցների մեղմացման կամ չեղարկման պայմանները․ Պեսկով

ՌԴ նախագահի մամուլի խոսնակ Դմիտրի Պեսկովը լրագրողների հետ զրույցի ընթացքում հայտարարել է, որ Վլադիմիր Պուտինի և Դոնալդ Թրամփի հանդիպման ժամանակ վերջինս չի բարձրացրել այն հարցը, թե Վաշինգտոնն ինչ գործողություններ է սպասում Մոսկվայից Սիրիայի և Ուկրաինայի հարցերում, որպեսզի մեղմացնի կամ վերացնի հակառուսական պատժամիջոցները։

«Ոչ, այդ մասին ընդհանրապես խոսակցություն չի եղել», - ասել է Պեսկովը՝ պատասխանելով լրագրողի համապատասխան հարցին։

Պեսկովի խոսքով՝ Կրեմլն սպասում է Սիրիայում և Ուկրաինայում իրավիճակի կարգավորման հարցով համագործակցության կոնկրետ առաջարկների, ինչն ավելի վաղ Թրամփը ներկայացրել էր որպես պատժամիջոցների չեղարկման պայման։

«Պետք է հասկանալ՝ կոնկրետ ինչ պայմանների մասին է խոսքը։ Մենք, իհարկե, ողջունում ենք հայտարարությունները, որոնք հաստատում են համագործակցելու պատրաստակամությունը, բայց ավելի լավ կլիներ կոնկրետ գործողություններ տեսնել», - ասել է Կրեմլի մամուլի խոսնակը։

Խոսելով սիրիական հակամարտության մասին՝ Պեսկովն ընդգծել է, որ աշխարհի ոչ մի պետություն այնքան ներդրում չի ունեցել այս հակամարտության կարգավորման և փախստականների վերադարձի համար անհրաժեշտ պայմանների ստեղծան գործում, որքան Ռուսաստանը։

Կրեմլի մամուլի խոսնակը նշել է նաև, որ Պուտինի և Թրամփի հանդիպման ընթացքում չի քննարկվել Սիրիայում Իրանի զինված ուժերի զսպման հարցը։

Ավելի վաղ մի շարք ԶԼՄ-ներ հրապարակել էին ԱՄՆ նախագահի՝ ազգային անվտանգության հարցերով խորհրդական Ջոն Բոլթոնի հայտարարությունն այն մասին, թե իբր Ռուսաստանը, ինչպես ԱՄՆ-ը և Իսրայելը, նույնպես դեմ է Սիրիայում Իրանի ռազմական ներկայությանը։

Աղբյուր՝  http://tass.ru/politika/5475633