Անընդունելի է ԱՄՆ-ի կողմից Թուրքիայում օրենքի գերակայության սկզբունքի անտեսումը․ Էրդողանի խոսնակ

Թուրքիայի նախագահ Ռեջեփ Թայիփ Էրդողանի մամուլի խոսնակ Իբրահիմ Քալընն անընդունելի է համարում, որ Միացյալ Նահանգները փորձում է անտեսել թուրքական օրենսդրությունը ամերիկացի քահանա Էնդրյու Բրանսոնի գործում։ Այս մասին հայտնում է թուրքական Anadolu գործակալությունը։

«Անշուշտ, մենք անընդունելի ենք համարում ԱՄՆ-ի՝ մեր դատական գործընթացները հաշվի չառնելու փորձերը։ Թուրքիայում գործում է օրենքի գերակայության սկզբունքը։ Էնդրոյւ Բրանսոնի նկատմամբ, որպես ֆիզիկական անձի, սկսվել են իրավական գործընթացներ», - ասել է Քալընը։

Նրա այս հայտարարությունը պատասխանն էր ԱՄՆ նախագահի՝ ազգային անվտանգության հարցերով խորհրդական Ջոն Բոլթոնի՝ ավելի վաղ արած հայտարարությանը, ըստ որի՝ թուրք-ամերիկյան հարաբերություններում առկա ճգնաժամը հնարավոր է հաղթահարել վայրկենապես, եթե Անկարան ազատ արձակի Բրանսոնին։

Օգոստոսի 17-ին Իզմիրի դատարանը կրկին մերժել էր քահանային տնային կալանքից ազատելու մասին միջնորդությունը։

Օգոստոսի 1-ին ԱՄՆ ֆինանսների նախարարությունը պատժամիջոցներ էր սահմանել Թուրքիայի արդարադատության նախարար Աբդուլհամիդ Գյուլի և ներքին գործերի նախարար Սուլեյման Սոյլուի նկատմամբ։ Թուրքիայի արտաքին գործերի նախարարությունը դատապարտել էր ԱՄՆ-ի այս որոշումը և կոչ արել այն չեղարկել։

Ամերիկացի քահանա Էնդյու Բրանսոնը ձերբակավել է նախորդ տարի։ Նա մեղադրվում է Քրդստանի աշխատավորական կուսակցության և Գյուլենական շարժման հետ կապ ունենալու մեջ։ Թուրքական իշխանությունները հենց այս շարժման են մեղադրում Թուրքիայում տեղի ունեցած հեղաշրջման փորձը կազմակերպելու մեջ։

Մայիսի 7-ին Բրանսոնը կանգնել է թուրքական դատարանի առաջ և չի ընդունել ահաբեկչական գործունեություն ծավալելու և լրտեսության մասին մեղադրանքները։ Հուլիսի 25-ին նրա նկատմամբ սահմանվել է տնային կալանք։ Դատախազությունը պահանջում է 35 տարվա ազատազրկման ենթարկել քահանային։