Թուրքիայի և Ռուսաստանի պաշտպանության նախարարները քննարկել են Սիրիայում տիրող իրավիճակը
Ռուսաստանի Դաշնության պաշտպանության նախարար Սերգեյ Շոյգուն հեռախոսազրույց է ունեցել Թուրքիայի պաշտպանության նախարար Հուլուսի Աքարի հետ։ Այս մասին տեղեկացնում է թուրքական Anadolu գործակալությունը։
Նշվում է, որ երկու երկրների պաշտպանական գերատեսչությունների ղեկավարները քննարկել են սիրիական հակամարտության կարգավորման հարցը, ինչպես նաև երկկող համագործակցությանն առնչվող թեմաներ։
Այս ամսվա ընթացքում Շոյգուն և Աքարը արդեն անցկացրել են երկու հանդիպում։ Առաջին հանդիպումը տեղի է ունեցել օգոստոսի 17-ին՝ Մոսկվայում։ Հանդիպման ընթացքում քննարկվել են Սիրիայում հումանիտար իրավիճակը, փախստականների վերադարձի հարցը, ինչպես նաև Թուրքիայի և Ռուսաստանի պաշտպանական գերատեսչությունների համագործակցությունը։
Երկրորդ հանդիպումը տեղի է ունեցել այս ամսվա 24-ին, որին մասնակցել է նաև Թուրքիայի հետախուզական ծառայության ղեկավար Հաքան Ֆիդանը։ Այս հանդիպմանը նույնպես քննարկվել է Սիրիայում տիրող իրավիճակը և երկու երկրների ռազմատեխնիկական համագործակցությունը։