Թուրքիան, չնայած ԱՄՆ-ի ճնշումներին, ձեռք կբերի ռուսական Ս-400 համակարգը․ Էրդողան
Թուրքիան նախատեսում է մոտ ապագայում ձեռք բերել ռուսական Ս-400 զենիթահրթիռային համակարգը՝ հաշվի չառնելով ԱՄՆ-ի դժգոհությունները։ Այս մասին հայտարարել է Թուրքիաի նախագահ Ռեջեփ Թայիփ Էրդողանը։
«Երբ Սիրիայի տարածքից մեր վրա հրթիռներ էին ընկնում, և զոհվում ու վիրավորվում էին մեր քաղաքացիները, ՆԱՏՕ-ի մեր դաշնակիցներն սկսեցին Թուրքիայից դուրս հանել ՀՕՊ համակարգերը։ Մեզ պետք են այդ համակարգերը, սակայն նրանք հրաժարվեցին մեզ դա տրամադրել։ Թուրքիան Ս-400-ի կարիքն ունի, և այդ պայմանագրի հարցը լուծված է։ Ես հույս ունեմ, որ մոտ ապագայում մենք այդ համակարգերը կստանանք», - հայտարարել է Էրդողանը։
Նա Վաշինգտոնին քննադատել է նաև Ս-400-ի հարցը Ֆ-35 կործանիչների հետ կապելու համար։
«Նրանք փորձում են կանգնեցնել նույնիսկ այն մատակարարումները, որոնց համար արդեն վճարվել է։ Մենք վճարել ենք 900 միլիոն դոլար, և նրանք պետք է մեզ մատակարարեն 120 Ֆ-35 կործանիչ», - հավելել է Էրդողանը։
Հիշեցնենք, որ նախորդ տարվա դեկտեմբերին Թուրքիան և Ռուսաստանը համաձայնագիր են կնքել Ս-400-ի ձեռքբերման վերաբերյալ։ Ըստ համաձայնագրի՝ Անկարան պետք է գնի զենիթահրթիռային այս համակարգի երկու մարտկոց։
Միացյալ Նահանգները և ՆԱՏՕ-ն բազմիցս քննադատել են Թուրքիային այս համաձայնագրի համար։ ԱՄՆ պետքարտուղարի օգնական Ուես Միթչելի խոսքով՝ Ս-400-ի ձեռքբերումը կարող է բացասականորեն ազդել ամերիկյան Ֆ-35 կործանիչների՝ Թուրքիա մատակարարման վրա։
Ի պատասխան՝ Անկարան հայտարարեց, որ միջոցներ կձեռնարկի, եթե Միացյալ Նահանգները փորձի կենսագործել հնչեցրած սպառնալիքները։