Մենք չպետք է որևէ մեկից թույլտվություն հարցնենք ռուսական Ս-400 համակարգը գնելու համար․ Էրդողան

Անկարան որևէ մեկից թույլտվություն չի հարցնելու ռուսական Ս-400 զենիթահրթիռային համակարգը ձեռք բերելիս։ Այս մասին հայտարարել է Թուրքիայի նախագահ Ռեջեփ Թայիփ Էրդողանը։

«Մենք Ս-400-ի հարցով պայմանագիր ենք կնքել Ռուսաստանի հետ։ Ոմանց դա անհանգստացնում է։ Ներողություն, բայց մենք չպետք է որևէ մեկից թույլտվություն խնդրենք», - ասել է էրդողանը։

Ավելի վաղ նա հայտարարել էր, որ, չնայած ԱՄՆ-ի ճնշումներին, իրենք շատ մոտ ապագայում արդեն ձեռք կբերեն ռուսական զենիթահրթիռային համակարգերը։

Հիշեցնենք, որ նախորդ տարվա դեկտեմբերին Թուրքիան և Ռուսաստանը համաձայնագիր են կնքել Ս-400-ի ձեռքբերման վերաբերյալ։ Ըստ համաձայնագրի՝ Անկարան պետք է գնի զենիթահրթիռային այս համակարգի երկու մարտկոց։

Միացյալ Նահանգները և ՆԱՏՕ-ն բազմիցս քննադատել են Թուրքիային այս համաձայնագրի համար։ ԱՄՆ պետքարտուղարի օգնական Ուես Միթչելի խոսքով՝ Ս-400-ի ձեռքբերումը կարող է բացասականորեն ազդել ամերիկյան Ֆ-35 կործանիչների՝ Թուրքիա մատակարարման վրա։

Ի պատասխան՝ Անկարան հայտարարեց, որ միջոցներ կձեռնարկի, եթե Միացյալ Նահանգները փորձի կենսագործել հնչեցրած սպառնալիքները։